Syria hmarthlang lamah US kaihhruaia beihpui thlaknaah ISIL (ISIS) pawla tel hlun tak man niin SANA state news agency leh indo viltute chuan an sawi a. Hetih lai hian Syrian venhim hna thawktute leh Syria-a sorkar hnuaia Al-Ekhbariya news agency chuan man tuma an beih laiin a tlanchhe hman niin an sawi ve thung.
Nilainia thil thlenga man nia sawi hi ISIL-a supreme leader a ni mai thei tih sawi a ni a. Kum hnih kal taah khan Turkish thuneituten an hotupa ber an thah hnuah ISIL hian Abu Hafs al-Hashimi al-Qurashi chu hotu thar a nih thu an puang a. US sipai chuan mi thah nia sawi chungchangah hian engmah sawi an la nei lo.
Britain-a Syrian Observatory for Human Rights (SOHR) chuan beihpui thlaknaah hian helicopter atanga zuang thla sipaiten Turkish ramri bul, Atmeh khuaah hian ISIL commander, Abu Hafs al-Qurashi hi an man niin a tar lang a. Amah hi Iraqi niin beihpui thlaknaah hian Iraqi dang pakhat thah a ni bawk tih an tar lang.
SOHR chuan mi man hian French tawng hmang a lo awmpui a, ani hi US sipaite hian an la tel nge Syrian venhim hna thawktute kutah an hlan tih hriat a ni lo tih an sawi a, an chet velna hi mi dang luh theih lohva khar a ni bawk.
Syrian sorkar TV erawh chuan Nilaini khan Iraqi mipa, Ali tia an sawi, a hming tak Salah Noman-a man tuma beih a ni tih an puang a. Noman-a hi a nupui, a fapa leh a nu nen apartment-ah an cheng a. Sorkar TV leh SOHR-in an hming hrang a puang hi eng nge a chhan hriat a ni lo.
Tun hi December thlaa rei tak rorel tawh, Bashar al-Assad-a paih thlak a nih hnua US sipaiten Syria hmar lama mi an luhchilh vawi hnihna a ni a. President Ahmed al-Sharaa-a chuan ISIL irh chhuah leh loh nan hma a lak thu leh US kaihhruaiin ISIL tangho beih zel an ni dawn tih a lo sawi tawh.
July thla khan US Central Command (CENTCOM) chuan ISIL hruaitu hlun leh a fapate pahnih chu Syria-a Aleppo region-ah an that niin US sipaiten an lo sawi tawh a. An mi thah hi Dhiya’ Zawba Muslih al-Hardani, leh a fapate pahnih, ISIS-a tel ve tho, Abdallah Dhiya al-Hardani leh Abd al-Rahman Dhiya Zawba al-Hardani niin an sawi.
May thla khan ISIL hian Syrian sipai an bei tih an sawi a, he hi al-Assad-a paih thlak a nih hnua sorkar sipai an beihna hmasa ber nia hriat a ni.
ISIL hian al-Sharaa-a kaihhruai sorkar ding mek chu dan lo tia sawiin hmar lama Kurdish sipaite lakah an che na zual.
An chak vanglai khan ISIL hian UK zahve aia zau, Iraq atanga Syria thlengin an thunun hman.
An vanglai hian an che na hle a, Syrian leh Iraqi tam tak suatin ram dang mi an mante lu an tansak thin a. Yazidi-te pawh an suat nasa a, kum 2014-a Iraq-a Sinjar-a an chennaa suat an nih vang hnuah an intung ding leh mek a, anni hi Zoroastrianism rinna peng pakhat zuitu an ni.
Kum 2017 khan Iraq-ah ISIL hi hneh niin kum hnih hnuah Syria-ah hneh an ni ve leh a. Hemi hnuah hian an mite chuan Africa leh Afghanistan-ah pawi an la khawih reng tho.
US-in Suria-ah ISIL hruaitu hlun man
