US indo lawng leh sipaiten Caribbean lut ta

US indo lawng leh sipaiten Caribbean lut ta
US lawng sipaite chu khawvela indo lawng lian ber, USS Gerald R Ford nen Caribbean an thleng ta tih US Navy-in a sawi.
Ral beih inpeih sipaite hi President Donald Trump-a’n thla hmasaa thu a pek anga che chhuak niin tuipuia ruihhlo phur lawng nia an sawi an beih fo avanga Venezuela nena an inkar a chhiat mek lai a ni.
US hian Caribbean leh Pacific khawchhak lamah ruihhlo tawlhtute lawng nia a sawi 19 kap tawhin mi 76 vel an thi.
Venezuelan President Nicolas Maduro leh Venezuelan thuneitute chuan US hian an sorkar paih thlak tumin hetiang hian hma a la niin a sawi.
Thlawhna phur lawng, aircraft carrier-in Caribbean a luh mek lai hian Trump-a sorkar leh President Gustavo Petro-a kaihhruai Colombian pawh an inmil lo ve mek bawk.
Petro-a hian Thawhlehni khan an rama venhim hna thawktute chu Caribbean-a lawng beihna a tawp hma chu an thil hriatte US agency-te hrilh tawh lo turin a ti.
US Navy chuan an lawng sipai leh an hmanraw liante hi Latin America leh Caribbean awptu, US Southern Command hnuaia awm turin November 11-ah an thleng tih an sawi.
USS Gerald R Ford aircraft carrier bakah sailor 4,000 chuang leh thlawhna thahnem tak a ni a. Guided-missile destroyer leh lawng dang beihna hmanraw hrang hrang an keng tel bawk.