US leh China inbiain inremna siam thei

US leh China inbiain inremna siam thei
US leh China inkarah inepna boruak tang tak tidai tura inbiaknaah ‘inremna’ siam a ni tih US President Donald Trump-a’n a sawi.
China-in US company-te hnenah magnet leh leilunga thir vâng chi thawn a remti a, US-in Chinese zirlaite visa a hnuh kir a pe let thung dawn niin a sawi.
“China nena kan indawrna tihfel a ni a, President Xi nen kan pawm chauh a ngai tawh,” tiin Trump-a hian a media platform Truth Social-ah a tar lang.
Khawvela economy lian ber pahnihte hi tariff inlaksaka nasa taka an inbeih hnuah May thla khan inrintawnna siamin ram pahnih aiawhte hi London-ah ni hnih an inbe zui leh ta bawk.
Kar hmasa khan Trump leh Chinese hruaitu, Xi Jinping chu phone-a inbiain indawr zuina tur kawng an hawng a, inbiaknaah hian an mi pawimawh tak takte an tel.
“Lehlam lehlam hian June 5-a hruaitu pahnihte phone-a an inbiaknaa an saiw kha a kalpui dan tur a thuphungin kan pawm a, Geneva-a sawi tawhte kan pawm bawk,” tiin China-a Vice Commerce Minister Li Chenggang chuan a sawi.
US Commerce Secretary Howard Lutnick-a pawhin lehlam lehlam hian ‘Geneva-a thil kalpui dan tur duan anga kal an remtiu’ tih thuthar lakhawmtute a kawmnaah a sawi.
“President-ten an pawm hnuah a taka kalpui dan dap zui a ni ang,” a ti.
CNBC hnenah an inbiaknaah hian Geneva-a inrem tawhna ang vekin thil an ti tih Nilaini khan a sawi a. “Kawng dikah vek kan kal a, engkim a thain a lang,” a ti.
London-a inbiakna hian US hnena China-in a magnet leh leilung thil vâng a thawn duh lohte sawi lansarh ber a ni a. Heng thil hi thil chi hrang hrang, smartphone atanga electric hmang lirthei siamna atana pawimawh a ni.
Beijing hian US-in semiconductor leh artificial intelligence (AI) atana hman chi thil a pe tha duh bik lo nia a sawi bakah Trump-a sorkarin Chinese zirlaite visa tihtlem a tum niin a sawi bawk.
Lutnick-a chuan CNBC hnenah hian US hian a khawi chin ngei chiang taka sawi lovin ‘khuahkhirhna’ thenkhat a hlip tih a sawi.
Kumim kum tira Trump-a’n ram hrang hrang atanga thil a lak luhte atanga chhiah (tariff) a tihsan vak kha a tuar na ber chu China a ni a. Beijing chuan a tih let nan US bungrua a lak luha tariff a tisang ve nghal vak a, ram lian hnih hi an inep nasahman hle.
May thla khan Geneva, Switzerland-ah indawrin inrintawnna an siam.
Trump-a hian Chinese bungruaa tariff an lak chu 145% atangin 30%-ah a tihniam a, Beijing pawhin 10%-a tihniamin leilung hauhsak thil hlu bik thawn chhuah a tihtawp pawh hlih a intiam a. Sumdawnnaa inremna siam zui turin ni 90 chhunga tihfel ni se an ti bawk a; mahse, ram hnihte hian an intiam angin thil kalpui lovah an inpuh zui ve ve.
Ni 90 an intiam angin London khawpuiah an indawr zui leh ta a, inremna neiin an inthen a ni.