US leh Saudi Arabia chuan inremna pawimawh tak, Gulf lalramin vantlang hman theih tur nuclear an siam theihna tura phalsakna an ziak.
Saudi Arabia-in civil nuclear programme an neih theihna tur inremna hi ‘peaceful nuclear co-operation agreement’ tia sawiin ‘American company-ten Saudi nuclear energy program’ hi awlsam zawkin an pawh theih dawn niin US energy department chuan a sawi.
Inremna thu leh hla hi vantlanga puan ni lo mah se US chanchinbute chuan Saudi Arabia hian nakin zelah uranium a tichak thei ang a, hei hi power plant-a tuialhthei atan an hmang ang a, nuclear bomb siamna atan erawh phal a ni lo.
Mi thiamte chuan US tan heng lai vel himna dinhmun chiang lo tak kara nakin zela nuclear ralthuam neih mai theihna tur kawng a hawnna hmasa ber niin an sawi.
US Department of Energy chuan thawhhona tur inremna hi ‘ram pahnihte tana him tawh inremna’ tiin an sawi.
“Kum tam tak dan anga inremna lo nei tawh pahnihte hian dollar tluklehdingawn tel inkawna, eibar leh thil pawimawh bik, nuclear thlenga thawhhona tur an siam a ni,” tiin an tar lang.
Saudi sorkar pawhin inremna hian ‘ram pahnihte inkara energy-a thawhhona tha awm leh huang zauh zel tumna’ a lantir tih sawiin Saudi hruaituin November thlaa Washington a tlawh atanga bul tan a nih thu an sawi.
Inremna ziah a nih mek lai hian US leh Iran chu an inbei nasa hle a. US thian tha ni reng, Saudi Arabia-ah hian US hian awmhmun tam tak neiin Iranian-te hian an bitum nasa hle a. Iran-in Temen-a a thawhpui, Houthi-in,lalram laka ‘tuipui danchan’ a kalpui hnu ni hnihah inremna hi ziah a ni.
Inremna ziah hi US-ah chuan sawiho turin Congress-ah put luh a ni dawn a. Rorelna in hniha member thenkhat chuan an duh lo va, chutih rualin President Donald Trump-a Republican Party chu in sang leh hniam zawka member ngah zawk ve ve an ni.
US leh Saudi ramten nuclear inremna siam
