Argentine superstar an chhawr hma chiaha match 11 chhung chak ni hmel hmu lo zawn tawh Inter Miami chuan Lionel Messi an rawih hnuah an hmaa ding tawh phawt an palzut a ni ber a, Inrinni Leagues Cup final penalty shootout-ah 10-9-a Nashville SC hnehin an club chanchina trophy hmasaber an hlawhchhuak a, United States leilunga Messi title hmasaber a ni zui nghal bawk.
Major League Soccer leh Mexican Liga MX club-te inelna tournament final-ah hian World Cup-winning forward Messi chuan box pawn atanga Miami hmahruaina goal a chhuihluh zet hnu second half-ah Fafa Picault chuan Nashville siphurh a sut a, goal dang luhbelh loin penalty-in a zui a; penalty petah hian team pahnih player-te’n an hlah duh lo khawp mai a, Miami player 10-in an chhuihluh hnuah an goal-veng Drake Callender chuan Nashville goalkeeper Elliot Panicco pet a dansak a, Inter Miami kutah Leagues Cup a lut ta a ni.
Tarlan tawh thin angin, thla hmasa maia Messi an sengluh hmaa Miami dinhmun a chhe hle a, tun season-ah hian Major League Soccer lama an record chhiatber hun an tawngbua a, mahse, Messi leh a Barcelona team-mate hlui pahnih Jordi Alba leh Sergio Busquets an rawih hnuah hmuh theihin Inter Miami an kang a, Inrinni game kha a zawna match sarih tlawm an pumpelhna ni tawhin, kum 2020-a club a din atanga an trophy hmasaber an sualchhuak ta hial a ni.
Kum 36 mi ni tawh Argentinian chuan a club thar tana game sarih a khelhah goal 10 khawl tling tawhin, Inrinnia champion lawmnaah a team-mate rualin player of the tournament-a thlan Messi chawimawina’n boruakah an vawrhkang a, khawvela footballer tha ber tiin an fak bawk.
Inter Miami hian final luh theihna hun remchang dang nei leh mekin, Nilaini hian US Open Cup semi-final pakhat zawkah Cincinnati an hmachhawn ang.
Club neitu pakhat David Beckham chuan Barcelona trio hluite chu an club-in vanneihna an tawnbuak kawnga danglamna thlentu an nih thu sawiin, “Kan hun tawn hi movie ang mai a ni. He mite pathum inkhel hian mi a tiphurin, a tizauthau a ni ber a, an khel zawng zawng hi a mawi a ni,” a ti.
Spain midfielder Busquets pawh tawng-chhuakin, “He team hmasawnna hi a zuanin a zuang a ni ber a, kan hlim takzet a ni. Team solid kan dinchhuak mek a, khawvel player thaber a nih miau vanga danglamna thlen thei Leo kan kawl bawk.”
Inrinnia a hnehna sualchhuah leh nen tum sarih ngawt Ballon d’Or winner ni tawh Messi kutah trophy 44 a lut tling ta a, ani tluka trophy la hnem an awm lo.
US leilunga Messi trophy hmasa a hmin
