Kum khat chhunga grand slam tournament hnuhnungber US Open chu August ni 26 atanga September ni 8 chhung hian New York khawpuiah khelh a ni leh dawn a, hmeichhe singles title la thei tura langsar zingah world number one Iga Swiatek chuan mi rin a kai zual a; Pole bakah hian Olympic gold medallist leh world No. 7 ni bawk Qinwen Zheng leh big-serving Elena Rybakina-te pawh dahhniam an rem lo ang.
Champion thei tur khawpa thiamna leh tawnhriat nei zingah tunlaia chetha mar zet Aryna Siarhiejeuna Sabalenka, big-serving Elena Rybakina leh defending champion Coco Gauff-te pawh sawi hmaih thiang an ni lo!
Pole Swiatek hian khawvel a hneh thinna ang taka khelh chhuah la harsat tluang zel rih mah se tennis great Chris Evert chuan a la dahsang hle a, a tum hnihna atana US Open title hawn leh turin talent a nei tha tawk a, rilru lamah a a paukhauh tawk bawk niin a sawi.
Kumin June thla mai khan Swiatek hian French Open title pali la tling hlimhlawt mah se Wimbledon third round-ah a tlawm a, Paris Games-ah lah khan beisei pha loin bronze awrh chauh a; Pathianni mai khan Cincinnati lamah a elpui lian zinga mi Aryna Sabalenka chuan a sawp nek bawk!
Hei hi a dinhmun tharlam ber ni bawk mah se kum 23 mi hi a nep ta thut tihna a ni lo a, a serve kikawi lak harsa zet te, inveng tura a tuan tha lutuk te, a game thlirna dik zet thinte kha a thawh fuh chuan tu nu han hneh mai mai chi a ni lo a, Flushing Meadows-ah hian champion tum ngamte tana paltlang ngei ngei ngai a la nih ngei a rin ngheh tlat thu 18-times Grand Slam champion Evert chuan a sawi.
Hmeichhe world number one hlui Evert hi tunah ESPN tan tennis analyst a ni mek a, a thlirna hi hnawlsak ngawt chi a ni hauh lo ang!
Evert vek hian Ne w York hard court-a Pole elpui lian tur sawilang telin, Sabalenka, Rybakina leh Gauff-te hming a lam ri.
US Open hian kum 2012 atanga 2014 chhunga a zawna vawithum champion thei Serena Williams hnu lamah khan women’s title humhim thei a la tawng leh ta ngai lo a, tunhnaiah beisei angin khel tha zo lo mah se defending champ Coco Gauff hian a title kawl lai humhim turin theihna a nei tih chu US Open trophy vawiruk dawng ve tawh Chris Evert-i ngaihdan leh thlirdan a ni.
Chinese nula dehkhirh Qinwen Zheng pawh hi Paris Games clay-court champion ngat a ni a, ram tana singles tennis title a sualchhuahna kawngah straight sets hmangin top-ranked Swiatek a paltlang miau a, Flushing Meadows-ah hian rin kai lo zia a ni lo!
Kumin hian a champion a nih ngat chuan kum 21 leka upa Zheng-i hi major title pahnih la tling Li Na hnu lama Chinese singles player tha ber a tih ngam dawn.
Kumin Paris Olympic Games-a women’s doubles gold medal awrhtu fifth-ranked Jasmine Paolini leh Italian zinga tennis gold awrh hmasaber Sara Errani-te bakah unseeded Romanian Ana Bogdan-te pawh thleng sang tur zinga ngaih an ni.
US Open lalnu ni thei tura rinkai thlirkual ang
