US Open women’s singles: Gauff leh Swiatek chesual duh lo

US Open women’s singles:
Gauff leh Swiatek chesual duh lo
Thawhlehnia bul tan zingah United States innghahna lian Coco Gauff leh champion hlui dang Iga Swiatek-te chuan US Open first round match an paltlang ve ve.
2023 champion Gauff hian Ajla Tomljanovic chu 6-4, 6-7(2), 7-5-in a hneh hram a, Australian unseeded player hi American tan fiahna lian a tling.
Third seed Gauff hi a mentor Matt Daly nena inthen hlimhlawt niin, thurawn petu dang atan biomechanics specialist Gavin MacMillan a ruai a, chutia a team a siksawi hnu lawkah New York a pan a, Arthur Ashe Stadium-a a bul tan dan a derthawng hle a, a bikin, a service a nghet lo.
Tomljanovic hian kum 2022 pawh khan set thum inbeihnaah Serena Williams hnehin, kha match kha a hmingthanpui viau a, tunah mihang player dang, tum hnih lai major champion ni ve tawh Gauff a sual tawk leh hle a ni.
Nervous hle chunga tlang hram Gauff hian second-round lamah Paris Olympics silver medallist Donna Vekic a tum leh dawn a, Vekic hi 3-6, 7-5, 6-3-a Jessica Bouzas Maneiro hnehtu a ni.
Home favourite Coco Gauff hian inkhelh banah a match paltlang kha inkhel harsa zet a nih thu sawi chung leh a khelh that ber hun a ni lo tih sawi chungin a tlang hram kha a hlim takzet tih a sawi a, taksa lam ai mahin rilru lamah a rimtawng tih a tarlang tel!
Kum 21-a upa reigning French Open champion hian Cincinnati-a Italy nula Jasmine Paolini a ngam loh tum khan double fault tum 16 ngawt a nei a, US Open bul a tanna inkhelah pawh a harsatna tawh mek chuan a la kiansan hlei thei lo a, 79th-ranked Tomjlanovic nen an insualtawk leh erh a nih kha!
Thawhlehni first round inkhel dangah Poland chhuanvawr Iga Swiatek chuan Colombia nula Emiliana Arango lakah harsatna tawk loin darkar khat lek chhungin 6-1, 6-2 hnehna nuamsa a chang.
Wimbledon winner Swiatek hian US Open warm-up tournament hnuhnung Cincinnati title chawi chungin New York a thlawklut a, Arthur Ashe Stadium-a bul a tan tum pawh hian a inringtawk hle a, kum 2022 hnu lama US Open trophy lak leh a tumna kawng kal mekah kum 24 mi hian Netherlands player Suzan Lamens a hmachhawn leh ang.
French Open title pali baka US Open leh Wimbledon title pakhat ve ve la tawh world number two Iga Swiatek hian thla hmasa mai khan a chetthat mawh thinna grass-court ngei maiah a vawikhatna’n major trophy a hlawhchhuak thei a, a hawiher leh a bultan dan enin Flushing Meadows-ah hian a vawihnihna atan title a lak leh rinna a lian chho zel dawn niin a lang!
A tum hmasakber world number 84 Arango kha chu a la tenau deuhin, Pole tan fiahna a la tling lo kan ti a nih pawhin winner tum 26 ngawt a nei leh break point hmachhawn miah loa a serve 76% a hlawhtlingte khan US Open women’s singles title beisei ve dangte tana paltlang ngai tur a nihzia a pholang chiang mai awm e!
US Open mixed doubles kalphung thar an duanchhuahah khan Casper Ruud nen inkawpin defending champions leh doubles specialists ni bawk pair Sara Errani leh Andrea Vavassori hneh loin tlawm mah se tun hi hi singles a ni tawh miau a, Swiatek-i maltan theih hun a ni a, mal leh malah chuan pawisa thap tur ni se mite dah huaina tur tak a ni khawp ang!
Second round-a a tum leh tur Suzan Lamens pawh hi world number 66-na daih niin, awlsam taka paltlang leh tura beisei a ni..
Second round langsar zingah Japanese Naomi Osaka pawh telin, red Nike outfit inbel chungin Louis Armstrong Stadium lamah Belgium player Greet Minnen chu 6-3, 6-4-in a hneh a, a vawi thumna atana New York title hawn leh a tumnaah world number 106-na laka Thawhlehni first round match kha a tan fiahna a la tling lo.
Eighth seed Amanda Anisimova pawhin second round a luhna kawngah Australian Kim Birrell chu 6-3 6-2-in a sawp ve bawk.
American Anisimova tan tun kha kumin Wimbledon final-a 6-0 6-0 teh thlawta Swiatek a ngam loh hnua Grand Slam match a khelh leh vawi khatna niin, London final pui boruak nen kha chuan an ram leilunga inkhelh chu a dan a dangte pawh a ni mai thei a; second-round lamah Australian leh bawk, tleirawl Maya Joint a tum leh ang.
Tualchhung player Danielle Collins ve thung erawh nikum ang bawkin a tla hma leh ta a, Jacqueline Cristian of Romania laka a tlawmna kawngah game hnih chiah a la!
World number 50 Cristian laka 2019 Australian Open semi-finalist Collins chet theih loh viau chhan kha hnungzang nain a tihbuai vang niin, taksa lama harsatna tawk ve lo Jacqueline Cristian chuan 6-2 6-0 hnehna nen second round a lut ta zawk a ni.
Russian 20th seed Diana Shnaider pawh pawh first round paltlang zo lo zinga a langsar pawl niin, Germany nula Laura Siegemund chuan 7-6 (7-3) 2-6 6-3-in kum 21 mi hi a hnawtchhuak.
Britain star Sonay Kartal pawh US Open first round paltlang zo lo zingah telin, Brazilian 18th seed Beatriz Haddad Maia chuan 6-3 1-6 6-1-in a hneh.
British number three Kartal hian Wimbledon-ah khan last 16 hial thleng mah se a New York main-draw debut-ah taksa lam harsatna neuh neuh a nei a, a tum angin a khel chhuak thei lo tih a sawi.
Briton an hek chho hle a, Katie Boulter pawh Ukrainian 27th seed Marta Kostyuk lakah tlawmin, qualifier Francesca Jones chu Germany nula Eva Lys chuan a hlap chhuak a; lucky loser Billy Harris pawh Canadian 25th seed Felix Auger-Aliassime ngam loin a tla bawk.
British number four Jones hi qualifying kaltlanga main draw debut nghakchhuak niin, 59th-ranked Lys lakah 6-0 7-5-in a tlawm.
Kum 24 mi Jones hian second-tier WTA 125 Tour title pahnih a lak hnuah ranking-a a dinhmun chu 86-ah a kai chho a, mahse, Grand Slam boruak chu a la zo chiah lo deuh niin a lang!
Mipa lamah pawh Briton dang, kum 30 mi Harris chuan final qualifying round paltlang zo lo mah se midang inhnuhdawh avangin main draw a thleng a, mahse, 2021 semi-finalist Auger-Alissiame lakah British number six hi a ruh a la no deuh a, 6-4 7-6 (10-8) 6-4-in a tlawm!