US President Biden tlu palhin titi siam nasa

US President Joe Biden chu US Air Force Academy, Colorado a graduation ceremony neihnaa diploma a semchhuah laiin a tlu.
Biden hi US president upa ber niin kum 80 a ni mek a, a tlu hi kaihthawh vat niin engmah intihnat erawh a nei loin a lang thung.
President hi a tluk hmain darkar khat leh a chanve vel lai ding tawhin graduating cadets 921 te hnenah chibai a sem a ni.
White House communication director chuan ‘A tha e’ tiin a sawi zui nghal a. “Kut thinga chibai a sem laiin a tlu palh a lawm mawle,” tiin Ben Labolt chuan a sawi a.
“Ka tlu palh a,” tiin president Biden pawhin a hnua White House a thlen hnuah a sawi bawk.
White House press secretary Karine Jean-Pierre pawhin Biden chu a that thu sawiin engmah harsatna a nei lo tiin a sawi a.
Sawiseltute chuan Biden chu president term hnihna chelh turin a upa lutuk tawh an tih reng a ti thung a. Tun hnaia poll lakah pawh US voters tam zawkte chuan a chak leh a nih pawhin kum 82 a ni tawh dawn tia sawiin a kumah hlauhthawnna an neih tawh thu an sawi a ni.
A hma pawhin Biden hi a bicyle atanga a chhuk tur a tlu tawh a, Air Force One leihlawnah pawh a tlu tawh bawk.
Kum 2024-a White House luah tur thlannaa Republican frontrunner tur nia ngaih President hlui Donald Trump chuan, “A nat loh ka beisei” tia sawiin kum 76-a upa Trump chuan Biden kum chungchang sawiin ‘Phurna min siam vak lo’ a ti bawk a.
“I fimkhur a ngai a, a chhan chu tluk i duh dawn lo” tiin Trump chuan a sawi a, hei hi kum 2020 a Trump an fimkhur taka stage chhuahsana a kal a sawina anga ngaih a ni.
Florida Governor Ron DeSantis, Republican nomination hmuh tum pawhin, “Inhliam palhna a neih awm theiah Joe Biden a dam that vat nan kan duhsak a ni” a ti a, “Chutihrual chuan United States of America chu Joe Biden leh a policy avanga hliam a tawrh atanga a dam vat kan beisei bawk,” tiin a sawi.
Biden an physical examination a neih hnuhnun ber chu kumin February thla kha niin White House physician Dr Kevin O’Connor chuan, “President chu mawhphurhna hlen turin a tha tawk a, engmah harsatna awm lovin a mawhphurhna a hlen thei ang,” tiin a sawi.