Donald Trump chu Manhattan grand jury, prosecutors leh defence lawyers te chuan March 31 khan thubuai siamsak tain US President hlui criminal charge hmachhawn hmasa ber tur niin nakuma White House luah tura inthlanna hmachhawn turah harsatna a siam nasat phah hle tura ngaih a ni.
Thubuai an siamsakna chhan hi kum 2016 presidential campaign laia nupa pawn lama mipat hmeichhiatna a hmana ngawi tura ka hup nana a mutpui sum a pek chungchang vang a ni a.
Trump thubuai siamsak hian local district attorney office chu presidential race awm mek lailumah dahlutin Trump-an a chenna veng tia a sawiah ngei criminal proceeding kalpui a ni dawn ta a. US-in politics-a inbeihna nasa tak a hmachhawn mek laiin Trump thubuai hian sawhkhawk nasa tak a nei tura ngaih niin Trump mai bakah amah thlawptute chuan Democratic tena politics thila amah tihchhiat nana an hmalakna angah an ngai bawk.
Trump chuan tun thlengin engmah tihdik loh leh tihsual a neih loh thu sawiin amah puhna te chu ‘politics thila tihchhiat tumna’ tia sawiin hei hian kum 2024 inthlanah Democrats-te a tihchhiat phah zawk dawn a ti bawk a. Trump-a defence lawyers Susan Necheles leh Joseph Tacopina te chuan Trump chuan ‘dan bawhchhiat a nei lo. Politics thila court hmanga hekna hi kan bei let ang’ tiin an sawi.
Trump thubuai hi kum 2016 atang daih tawha Trump-a celebrity hun lai atang leh politics-a luh a tum chhoh lai vel atanga intan a ni a. Prosecutors te chuan Trump-an porn actor Stormy Daniesl leh Playboy model Karen McDougal hnena mipat hmeichhiatna an hman an sawi chhuah a hlauh avanga ka hupna sum a pek an chhui chiang a ni.
Trump campaign officials te chuan Trump laka criminal chrage siam chu tun maiah kalpui a nih an rin loh laiin an tawng ta thut nia sawi niin Trump hian tun thubuai mai bakah hian kum 2020 inthlan kaihhnawih thil dangah leh classified document za tel chheprelha puhna a la hmachhawn mek bawk a.
New York khawpuiah Trump chuan thubuai a nei ta a ni mai a, hetih lai hian Atlanta leh Washington-ah pawh amah chhuina neih mek a ni bawk.
Republican party thunun tuma hma a lak mek laiin tun hmaa amah thlawptu lo ni tawh te leh lo dodal tawhtute laka harsatna a tawh phah zual dawna ngaih a ni bawk a.
Trump thubuai siamsaktu Manhattan District Attorney Bragg chuan March thla tir lam khan Trump chu grand jury hmaa inlan tur lo ti tawhin chu chu thubuai siamsak tumna kalzel a ni a.
Trump attorney te chuan hei hi hnawlin mahse lawyer Trump nena inlaichinna lo nei tawh chuan inlanna nei thungin chu chu Trump-a lawyer hlui leh fixer Michael Cohen credibility namnul tumna anga ngaih a ni.
Kum 2016 presdiential campaign lai khan Cohen chuan Daniels hnenah a ka hup nan $130,000 a pe a, hei hi a hma kum sawm kaltaa celebrity golf tournament-a Trump nena mipat hmeichhiatna an hman dun a sawi chhuah loh nana tih a ni.
Cohen hi Trump Organisation chuan Daniels hnena a sum pek hi an rul zui nghal a, chu mai bakah legal expenses tiin Cohen hnenah hian sum pek belh a ni bawk a. A vaiin Cohen chuan Trump organisation hian $4,20,000 an pe niin a sawi.
Kum 2016 tir lam khan Cohen bawk hian supermarket tabloid National Enquirer publisher chu Playboy model Karen McDougal hnenah Trump nena an chanchin a sawichhuah loh nan $1,50,000 a pek tir bawk a.
Hmeichhe pahnih te hnena sum pek hi an ka hup nana tih a nih laiin beisei loh lam daiha thil kalin news media lamah a darh ta chum chum zawk a ni.
New York-a Federal prosecutors te chuan kum 2018 khan Cohen chu federal campaign finance law bawhchhiaa puhin thubuai an siamsak a, trump presidential campaign nana sum thehchhuaha dan kalha cheah an puh a. Cohen hi thiamloh chantir niin lung inah a tan phah nghe nghe a ni.
Trump chuan court thubuai a neih chhunzawm reng chungin khatih laia US prosecutor te chuan an pumpelhsak thei zel a. Justice Department chuan president ni mek lai federal court-a thubuai neia inlantir chu rem lovah an ngai a ni.
Bragg-a hmaa District Attorney, Cyrus Vance Jr chuan kum 2019 khan investigation chu kalpui zui zelin a tirah chuan ka hupna sum pek chu a thlur bing a, a hnuah Trump-a sumdawnna kaihhnawih leh tax pek dan te chu an enfiah zui leh bawk a.
Vance chuan Trump Organisation leh chief financial officer chu chhiah awl ru tiin a puh zui bawk a. Ka hup nana sum pek hush money tia sawi hi D.A office leh a chehhvelah chuan ‘zombie case’ tia hriat lar niin a chhan ber pawh prosecutor te chuan ennawn ziahin mahse engmah thlak danglamna emaw an siam zui ngai loh vang a ni.
Mahse, Bragg a awm hnuah thil danglamin nikum December thla khan Trump Organisation te chu tax fraud charge a siamsak a, chu mai ni lovin white-collar prosecutor Mathew Colangelo chu chhui chianga grand jury thar din turin a ti zui ta a ni.
Cohen ber chu witness berah hman zui niin prosecutor te nen tum tam tak inhmuhna neiin emails, recording leh finfiahna awm thei hrang hrangte grand jury hmaah a pe lut zui bawk a.
Trump chuan Manhattan investigation chu nasa taka sawiselin ‘history a witch hun turu ber’ tihialin a sawi a, hei mai bakah hian mihang ni bawk Bragg chu sawiselin mingo te laka racist tiin a sawi bawk.
US President hlui Trump thubuai siamsak
![](https://theaizawlpost.org/wp-content/uploads/2023/03/us.jpg)