US president Joe Biden chuan Israel-Gaza war awm mekah ‘karleh Thawhtan’ ah inkahhaina a awm hman a beisei thu a sawi.
Hetihlai hian Qatar hmalakna in Israel leh Hamas aiawh te chuan inkahhai a awm theih nana inbiakna an neih chuan hmasawnna a nei tih a ni a.
“Ka national security advisor chuan inkahhai kan hnaih tih min hrilh a ni” tiin Biden chuan a sawi a.
Nikum 7 October a Hamas tena southern Israel runa mi 1,200 chuang an tihhlum hnuah Israel chuan Gaza a Hamas te chhutchimih tumin a bei zui ta a ni. Hamas te chuan mitang 253 an nei bawk a, chung te chu a then azar te chu chuhah zalen an ni tawh thung.
Hamas enkawl health ministry chuan Gaza Strip ah Israel runna avanga nunna chan 29,782 an tling tawh tiin a sawi.
Israel thlawptu lian ber US President Biden chuan inkahhai chungchangah New York a media mi te zawhna a chhanah, “Inkahhai kan hnaih” tia sawiin, “Kan la chingfel chiah lo va. Karleh Thawhtan khi chuan inkahhai a thlen hman ka beisei” tiin a sawi.
US State Department thupuangtu pawhin Thawhtan khan Israeli mitang te chuhah an nih theih nana inbiakna neihah hmasawnna a awm thu a sawi a. Mahse, rawtna thar ber chu Hamas ten an pawm dawn tih a la chiang lo tiin a sawi a.
“Egypt, Israel, United States leh Qatar te nena sawihona kan neihah hmasawnna a awm a ni” tiin Mathew Miller chuan a sawi.
Karkalta khan UN security Council ah Gaza ah inkahhai a awm theih nana resolution putluh chu US in a veto avangin sawisel a hlawh hle a. Mahse, US chuan temporary ceasefire resolution a ruahman thu sawiin chutah chuan Israel pawhin Gazan city Rafah chu a run tur a ni lo tih a tel thu a sawi.
Israel chu Gaza atanga tlanchhia leh mipui bit em em na Rafah khawpui chu run lo tura nawrna nasa tak a tawng mek a ni. Mahse, Israel Prime Minister Netanyahu chuan March 10 thleng Hamas te hun pe in chumi hmaa mitang te an chhuah azlen loh chuan Rafah an beih tur thu a sawi thung a ni.
US President Joe Biden an Karleh Thawh\an-ah Israel-Hamas inkahhai beisei ti
