November ni 5 a US in an president thar an thlan turah inbeihna a lian sawt hle a, party lian pahnih bakah, an candidate te pawhin tawngkam an duh tui lo sawt hle.
President ni lai Joe Biden chuan chuh nawn a tum tawh loh avangin vice president tanglai Kamala Harris chu Democratics party candidate a ni dawn a, Republican party lamin president kalchhuak ta Donald Trump din tir leh bawkin, tling ngei tumin hma an la nasa hle bawk.
Ramchhunga polls an lak hrang hrangah vice president ni lai Kamala Harris chuan hma a la hruai hret zel niin a lang a, hei hi debate hrang hrang leh mimal ngaihdan an lakkhawm atanga teh niin, milar tam tak tan zawngin a hril hle bawk nia sawi a ni.
President hlui Trump hi duhtu tam tak awm ve bawk mah se, a tawngkam leh a phunglungna hi ngai thei lo tam tak an awm ve tho bawk nia sawi a ni a, poll lak hnuhnung berah pawh a hniam zawkah tangin, a hniamna erawh a tlem hle thung.
September ni 10 a Pennsylvania hmuna an pahnih debate thlirtute kha 67 million chuang an ni a sawi a ni a, khata a thusawi avang khan Kamala hi a invawrh phahin, mipuiah thu a hril thui hle nia sawi a ni bawk.
Engpawh la thleng thei a ni a, an thusawi leh an debate hian an dinhmun dik tak a hril chhoh zel tawh avangin poll lak leh zel turah pawh an inlehthal zak zak thei a, tun dinhmunah chuan vice president ni lai Kamala dinhmun a kang rih hret a ni.
US president thlan turah tunge hmahruai zawk?
