US puihna tihtawp vangin mi mtd 14 thih belh dawn
Donald Trump-a’n US-in ram danga puihna a pek thin tam zawk a tihtawp chuan kum 2030-ah chuan thihna maktaduai 14 chuang a thlen belh thei dawn niin The Lancet chanchinbuin zir chianna a tar lang.
Thawhtannia zir chianna tar lannaah hian thi tur zinga hmun thuma thena hmun khat hi naupang, thih hun pangngai tur aia thi an ni ang.
US Secretary of State Marco Rubio-a chuan March thla khan President Trump-a sorkar chuan ram danga puihna an pek thin, US Agency for International Development (USAID) an tiha programee 80% chuang an titawp dawn tih a puang.
“Ram rethei leh a laihawl zingah he thilin a nghawng tur hi khawvel puma hripui leng leh indona lian tak chhuak tluk zet a ni dawn a ni,” tiin Lancet-a zir chianna ziaktu pakhat zawk, Davide Rasella chuan a sawi.
Barcelona Institute for Global Health-a zir chiangtu, Rasella chuan puihna pek thin tihtawp hian ‘kum 20 vel a derthawng zual zinga hmalakna awm tawh chu a tithuanawp dawn a ni’ tiin a sawi.
Tun kar hian Spanish khawpui, Seville-ah khawvel ram eng emaw zat chu United Nations kaihhruaiin mi dang puihna sawiho turin an thutkhawm dawn a, kum 10 chhunga a lian ber tum a ni dawn.
Ram 133 dinhmun an zirnaah zir chiangtute chuan USAID puihna hian kum 2001 leh 2021 inkar khan ram thang meka thihna thleng tur maktaduai 91 a veng niin an sawi.
US-in 83% a tihtawpin a nghawng turte an chhut nghal a. Kum 2030-ah chuan thihna thleng mek sa bakah maktaduai 14 chuang an thi dawn niin an chhut a. Heng zinga maktaduai 4.5 chuang chu naupang kum nga hnuai an ni dawn a, kum tin naupang 7,00,000 an thi dawn tihna a ni.
US hi khawvela ram danga tanpuina pe chhuak tam ber niin ram 60 chuangah an pe a. Pek an tawpsan avangin hmun tam takah mi tanpui hna a chawl thup mek.
Thla hmasa khan UN hotu pakhat chuan US puihna tihtawp a nih avang hian Kenyan refugee camp-ah chuan ‘zawi zawiin’ tam a thleng niin a sawi.
US puihna tihtawp vangin mi mtd 14 thih belh dawn
