US sipaiten Gulf pan, Trump-a’n Iran tan hun tiam a tawp a ti

US sipaite Gulf-a an inchhawp belh mek zel hnuah Donald Trump-a chuan Iran hnenah nuclear programme-a indawrna turin ‘hun tiam a ral’ tiin a vau.
US president hian ‘Armada lian tak chuan rang takin, chak tak leh tum neiin’ Iran an pan niin a sawi a, hei hi US lawng sipai tam tham tak a sawina a ni.
UN-a Iran palai pawhin chhangin Tehran chu ‘inzahtawn leh tum thuhmun neia indawr turin a inpeih’ tih a sawi a; mahse, a tul a nih phawt chuan amah a inveng thei a, ‘a hmaa la thleng ngai lova chhan let a ni dawn’ tih a sawi.
Iran hian a nuclear programme hi muanawm taka kalpui a nih thu a sawi fo va, US leh an thawhpui ramten nuclear ralthuam siam tuma an puhna chu nasa takin a pha tawh thin.
Trump-a’n a vauna thar ber hi tun thla tir lama Iranian-ten an sorkar laka lungawi lohna nasa tak an lantir laia sorkarin tharuma a chhan let tuma Washington-in mipuite chu puihna a pe dawn tih a sawi hnuah a ni.
“Tanpuina a lo kal mek,” tiin thuthar lakhawmtute hnenah a sawi a, a hnuah lungawi lohna lantirtute tihhlum an tawpsan avangin chutiang kalpui a tul loh thu a sawi leh bawk.
US-a Human Rights Activists News Agency (HRANA) chuan December thla tawp atanga Iran-a lungawi loh lantirnaah khan mi 6,301 vel thah an nih thu sawiin heng zinga 5,925 chu mipui zinga mi an ni tih a sawi.
HRANA hian chawlhkar thum dawn internet tihthih hnua thi sawi dang 17,000 an dawn chu an chhui mek thu an sawi bawk.
Pawl dang, Norway-a Iran Human Rights (IHR) pawhin thi zat hi 25,000 an tling thei tih a sawi bawk.
Trump-a thil sawi hnuhnung ber hi Iran nuclear programme chungchang bik a nih hmel a. “Iran hi rang taka dawhkan kil tura a lo kala dik leh tlang taka kan indawr beisei a ni a – NO NUCLEAR WEAPONS,” tiin Truth Social-ah a tar lang a ni.
Gulf-a a lawng sipai tirhte chu Nicolás Maduro-a an man tuma Venezuela-a a thawn aia tam an nih thu a sawi bawk.
US-in June thlaa Iranian nuclear hmun a beih tum, Iran leh Israel-te ni 12 an indo zuina pawh sawiin US president chuan, “Beih lehna hi chu a na zawk hle dawn! Thlentir nawn tawh suh,” a ti.
Hemi chungchangah hian Iranian Foreign Minister Abbas Araghchi-a chuan, “Sipai chana hmanga palai hna thawh hian awmchia leh tangkaina a nei lo,” a ti.
“US hian indawr a duh a nih chuan intihthaihna, thil phut lian leh tul lo tak tak sawi chhuak lovin ti rawh se,” tiin TV-a thu a sawinaah a sawi a ni.
Thlalem hmanga ennaah chuan US hian Jordan-a Muwaffaq Air Force Base-ah indo thlawhna 15 vel an thleng tawh. Indian Ocean-a Jordan, Qatar leh Diego Garcia-a an hmunah pawh thlawhna a pung tawh bawk.
Bungraw phur leh thlawhna tui thun theite pawh Middle East-ah an awm tawh a, FlightRadar24 tracking site-ah Iranian chhehvelah spyplane leh drone pawh hmuh a ni.
USS Abraham Lincoln aircraft carrier pawh a tum hmun thlengin Oman bul velah a awm niin US defence thuneituin a sawi.
Thlalem atang chuan US guided missile destroyer pahnih leh indo lawng pathum chu thla eng emaw zat Bahrain-ah a inhung tawh.
Tehran pawhin drone carrier ship IRIS Shahid Bagheri chu an vaukamah a hung bawk.