USA-a a kal chhan ber chu kohhran leh hnam inpumkhatna aupui turin a ni tih Mizoram chief minister Lalduhoma chuan a sawi Indiana State USA-a cheng Chin Community-ten Nilaini zana programme an buatsaih a hmanpuinaah Lalduhoma chuan US-ah Zofate kan thahnem ve ta a, USA citizenship nei leh voting right nei pawh thahnem tak an awm tawh avangin, tanrual phawt chuan politics-ah pawh ngaihpawimawh tham kan ni ve ta tih a sawi.
Sakhaw pakhat chhungah pawl hrang tam tak a awm angin, USA-ah Zofa unau zingah kohhran pawl hrang a tam a. Kohhran chu inpumkhatna aiin inpumkhat lohna thlentu a ni ang tih a hlauhawm hle tih a sawi. India ram leh Mizoramah ecumenical movement hi kalpui zel niin, tunah chuan kohhran hrang 8-in ‘Council of Churches in Mizoram’ an din thei dawn ta, US-a kohhrante pawhin mahni pawl thiat kher loin, kan zavaia huap zo tur thawhhona huang din ve thei se a lawmawm hle dawn tih a sawi a ni.
“Kohhran mal thurin hian Kristiante hi min thehdarh a. A then phei chu nupui pasala innnei thei lo hial khawpin min daidang. Kohhran mal thurin niloin, Kristian thurinah hian lungawi mai thei ila chuan, biak in, office, pastor a hranga neih kher a ngai lo anga, senso a tlem zawk anga, kan zahawmin kan ropui zawk ngei ang. Ka ngaihdan chuan, kohhran leh thlarau lam thila dik ber leh tha bera inngaite hi a dik lo ber an nih zawk ka ring,” Lalduhoma hian a ti.
Kohhran lam ang bawkin NGO hrang hrang a tam a. Chin Hills-ah revolutionary group hrang tam tam awmin, ethnic group thuhmun ni si thawk ho thei hauh lo pawh an awm a. Unau leh unau, thisen hial inchhuah chu a zahthlakin, sim a tul tih a sawi. Manipur lamah pawh pawl hrang an tam a. Tunah chuan impumkhatna lam hawiin ke an pen mek a, beiseina sang tak nen an thlir tih a sawi bawk.
“Tuna USA-a ka lokal chhan ber pawh inpumkhatna kawng zawng turin a ni. Unau kan ni a, inthen thei kan ni lo tih hi ka chah nawn leh che u. Engtikah emaw chuan hnama min dintu Pathian chakna hmangin, hnam ropui tak ni turin, rorelna pakhat hnuaiah kan la dingchhuak ang tih ring tlat ang u,” Mizoram chief minister hian a ti.
USA-a ka lokal chhan ber chu inpumkhatna kawng zawn a ni – Lalduhoma
