Concacaf Gold Cup 2025 khelh mekah champion tura rinkai zinga mi USA chuan an match hmasa berah awlsam takin hnehna an chang a, 5-0 ngawtin Trinidad and Tobago an sawp. Inkhel dangah Saudi Arabia leh Costa Rica ten hnehna an chang bawk.
Inelna thlengtu pakhat zawk USA hian an match hmasa berah Trinidad and Tobago chu PayPal Park, California-ah an hmachhawn. An khingpuite lakah hian an khel tha viau a, chawlhlawk hmain goal thum ngawt an thun hman. Inkhel tan atanga minute 16-naah Malik Tillman chuan hmahruaina goal a thun a. Goal hmahruai thuntu Tillman hian minute 41-naah an goal hnihna a thun belh zui leh bawk. Si hnih faia hma an hruai hnuin Patrick Agyemang chuan minute 44-naah an goal thumna a thun zui leh zat a, 3-0 ngawta hmahruai chungin chawlhlawk an hmang.
Chawlhlawk hnu lamah USA an khel tha chhunzawm a, goal thun belh thuai lo mah se hun tawp dawn hnaihah goal hnih an thun belh leh tho thung. USA tan hian Brenden Aaronson chuan minute 82-naah an goal lina thunin an hmahruaina a tizau. An goal lina an thun atanga minute hnih hnu lekah Haji Wright chuan an goal ngana a thun belh zui leh zat a, a tawp a khar. Goal nga ngawta an khingpuite an sawp vangin USA hi Group D-ah hmahruaitu an ni chhunzawm nghal.
Group D-a inkhel dangah inelna hmachhawn tura sawm Saudi Arabia chuan minute 21-naah Saleh Al-Shehri penalty pet goal hmangin hnehna an chang a, point thum an hmu ve bawk.
Thawhtan zing lama inkhel hmuhnawm takah Costa Rica chuan 4-3 in Suriname an hneh hram a, Group A hmahruaitu an ni zui nghal. Snapdragon Stadium-a inkhelah Costa Rica in bul an tan tha a, inkhel tan atanga minute 14-na lekah Alonso Martínez chuan hmahruaina goal a thun nghal. Minute 14-naa hmahruaina goal an thun hnu lawkah Manfred Ugalde chuan minute 19-naah an goal hnihna a thun belh zui leh nghal. Bul tan tha viau mah se an khingpui te er let an tuar lova, goal thum ngawt an chhuah zawn a, hnufual zawkah an tang leh hman.
Goal hnih chhuah zawn Suriname tan hian Gyrano Kerk chuan goal thunin an si phurh a sut then a, minute 59-naah Richonell Margaret chuan goal thunin an si phurh a sut zo. Goal hnih an thun zawn vangin an phur a, penalty an hmu zui leh zat bawk. Shaquille Pinas chuan chuan minute 64-naah penalty atangin hma an hruai letna goal a thun. Hnufual zawk an nih hnuin Costa Rica in goal thun tumin tan an khawh zui nasa hle a, inkhela hmuhnawm leh zual.
Tlawm pumpelh tuma thapui thawh Costa Rica tan hian Josimar Alcócer chuan minute 76-naah goal thunin an si phurh a sut. 3-3 a nih hnuin Costa Rica vanneih a kaltluang a, hun tawp dawn tepah penalty an hmu zui leh. Manfred Ugalde chuan minute 90’+13-ah penalty atangin goal pawimawh zet mai a thun a, inkhel hmuhnawm leh inhnehtawk takah 4-3 a hnehna changin point thum an hmu a, table hmahruaitu an nih theih phah bawk.
USA an chak awlsam
