Boxing-ah lian huanga inhnek hmuh chakawm, boxing ngaina-tute nghahhlelh em em chu a takin a thlen theih hmel ta lova, Tyson Fury leh Oleksandr Usyk ten inremna tluantlin an nei thei lo.
Palian huanga kawnghren ngaihhlut hlawh pathum; WBA (Super), IBF leh WBO bakah Ring magazine kawnghren kawl khawm mek Usyk leh WBC champion Tyson Fury te hi April ni 29-ah inhnek turin an indawr a, indawrna thui tak neiin, hlawh chungchang thlengin inrem bawk mah se an kawng daltu pakhat a awm ta tlat thung. An inrem theih loh nachhan, an mu tan lian ber chu inhnek nawn leh tura thu delhkilh neihah a ni. Ukranian boxer huaisen Usyk hian Fury nen an inremnaah rematch neih ngei tur tih thu bilh tel a duh laiin Tyson Fury aiawhte erawh chuan rematch neih kher tul an ti lo bur thung. Rematch chungchangah an inrem theih loh vangin inhnek ngaihven hlawh a thleng thei dawn rih lo a nih hmel.
Boxing-ah palian huanga kawnghren inkawl sem pahnih; Fury leh Usyk te hi hlawh lak dan tur chungchangah chuan harsa lo takin inremna an nei thei mai a. WBC champion Tyson Fury-a’n sum an lak luh atang 70% chan a phut chu WBA (Super), IBF leh WBO champion Usyk chuan awlsam takin a pawmpui thei mai. A tumpui tur Usyk aiin hlawh tam fal viau dawn mah se Fury hian Usyk hmachhawn a tum tak tak lo niin ngaih theih a ni a, rematch a duh lo teh tawp. Khawvelin palian huangah tlawm nei lova kaltluang mek Fury hi palian champion hlui Anthony Joshua nen an inhnek a hmu chak a, British boxer pahnihte hi inhnek tumin an indawr ve thin bawk. An inrem thei mai dawn emaw tih laiin rem lohna a lo awm leh thin a, Fury lam ten chhuanlam an siam leh mai thin. Heti a nih vang hian Fury hian Anthony Joshua leh Oleksandr Usyk te hi a hmachhawn hreh hle nia ngaitu an tam hle.
Tyson Fury nen inhnek tur an indawrna a tlawlh a, an inbiakna tihtawp a nih tak vang hian Ukranian boxer huaisen Usyk chuan a training camp pawh a chhuahsan fel tawh niin chanchinbu mite chuan an tarlanga, an inbiakna a tlawlh chungchang hi thuchiang awm thuai tura ngaih a ni.
Usyk hian British boxer lar Anthony Joshua hnein a kawnghren kawl lai pali a chhuhsak a. Joshua nen an inhnek nawnnaah hnehna changin a kawnghren a humhim a. Tyson Fury hneh ngei tum viau mahse hnek theihna hun tha a nei thei dawn ta lo niin a lang a, a ui viau tura ngaih a ni.
Tyson Fury nen an inhnek thei dawn lova a lan tak vangin WBA chuan Usyk hi amah chotu Daniel Dubois hmachhawntir an tum nghal a. Kum 25 mi Briton Dubois aiawhten an lam hawi a, ring chhungah fiahna hmachhawn huam turin Usyk an nawr.
Kum 1999 khan palian huanga inhnek ngaihven hlawh takah Lennox Lewis chuan Evander Holyfield a hneh a, palian huanga kawnghren ngaihhlut hlawh pali a kawl kim vek. Kum 1999 hnu lamah palian huangah kawnghren pali kawl kawp thei an la awm leh ta miah lova. Tyson Fury leh Usyk ten inremna an nei thei lo nia a lan tak vangin Lennox Lewis hnung zui thei an awm har leh zual dawn ta a ni.
Usyk leh Fury in rem thei lo
![](https://theaizawlpost.org/wp-content/uploads/2023/03/box-2.jpg)