Mizoram union territory nih laia MLA, tunhnaia thi Kapoor Chand Thakuri chu Assembly Session neihah sunna hun hman a ni.
Ni hnih awh tur Assembly thutkhawm chu Thawhlehni khan tan a ni a, thildang tih hma in MLA hlui, Gorkhali hnam zinga Mizoram Assembly member atana ruat hmasak ber leh awmchhun Kapoor Chand Thakuri sunna hman a ni.
Speaker sawmna angin House leader Lalduhoma chuan Kapoor Chand Thakuri chanchin a sawi a. 1940 September 9 ah Maubawk Veng Aizawlah a piang a, zirna lamah PUC (pawl 12) a zo a, eizawnna lamah Seventh Say Adventist Mission hnuaiah middle school zirtirtu a ni thin a, 1960- 1961 ah Gorkhali ME School Aizawlah zirtirtu a ni bawk. Hemi hnu hian sumdawnna bul a tan a ni.
Kum 1972-a Mizoram UT a nih khan sawrkarna siamtu Mizo Union chuan legislative assembly-ah hnam tlem zawkte tan nominated seat hnih dahin, Gorkhali leh Bru atangin MLA a ruat a. Gorkha aiawhin hetihlaia an hnam hruaitu bera ngaih Kapoor Chand Thakuri hi ruat a ni. A kum upat hnu ah Kathmandu ah awmin, kumin July 15 khan a thi a ni.
“Mizoram Legislative Assembly chuan Pu Kapoor Chand Thakuri hi a ui takzet a. Ram leh hnam tana hna a lo thawhte a ngaihlu in a chhuang hle a ni,” House leader hian a ti.
House leader bakah leader of the opposition Lalchhandama Ralte leh minister Vanlalhlana ten a chanchin leh an ui thu an sawi bawk.
UT laia MLA thin House-ah sun
