State sorkar ruat panel te chuan Uniform Civil Code (UCC) draft chu February 2 khan Uttarakhand Chief Minister Pushkar Singh Dhami hnenah Dehradun-ah an thehlut.
Draft hi Chief Minister hnenah five-member committee retired Supreme Court Judge Ranjan Prakash Desai chuan a thehlut a ni.
Draft a dawn veleh Dhami chuan Delhi-a senior BJP leader-te hmu tura a kal nghal tur thu a sawi nghal bawk.
Dhami chuan, “Kum 2022-a assembly poll neih hmaa state mipui te hnena kan thutiam kan tihhlawhtlinna kalzel a ni” tia sawiin Dhami chuan a zawna term hnih chelh tura thlantlin an nih hnuah a cabinet-te nen chuan UCC draft tur committee din nghalin an intiamna tihhlawhtlin ngei an tum thu a sawi a ni.
“Panel-te hi lehkhathiam tak tak an ni a, mipuite nen society-a pawl hrang hrang te, tribal-te nen draft siam hmain an sawiho hmasa a ni” tiin a sawi bawk.
“Kan nghahhlelh em em a lo thleng dik ta. UCC draft chu kan hnenah thehluhin a awm ta a. Kan zirchiang ang a, kan enfiah ang a, kan sawiho ang a, chumi hnuah state assembly-ah session lo awm turah kan pharh ang” tiin a sawi.
Panel member tinte chuan draft an submit dawn hian Chief Minister chenna hi an pankhawm a. Desai bakah hian panel member-te chu retired Chief Justice of Sikkim High Court Pramod Kohli, social activist Manu Gaur, former Uttarakhand Chief Secretary Shatrughan Singh leh Vice Chancellor of Doon University Surekha Dangwal te an ni.
“Hna pawimawh tak chu Sun God in hmar lam a her laiin zawhfel a ni a. Ayodhya-ah Ram Temple hawn a ni tawh a, Parliament-ah interim budget pharh a ni tawh bawk a, tunah UCC draft kan dawng leh ta” tiin Chief Minister chuan a sawi.
UCC hian uniform marriage, divorce, land, property leh inheritance law te khua leh tui tinte sakhaw tihbik nei lova an hman vekna tur dan a ni dawn a ni.
Kalpui a nih chuan Uttarakhand chu Independence hnua UCC hmang hmasa ber State a ni dawn a. Goa ah chuan Portuguese ho rorel lai atang tawha hman a ni tawh thung.
UCC pawm a nih theih nan hian Uttarakhand Assembly chu ni li chhung February 5-8 inkar chhungin special session koh a ni der tawh bawk.
Draft hi Assembly-a Bill anga pharh a nih hmain State Cabinet chuan an enfiah hmasa phawt dawn a ni. UCC draft tur hian panel hi May 2022 khan din a ni a, a tirah chuan thlaruk chhung hun pek a ni a, mahse, thla li pawhsei sak leh an ni.
Rawtna ringawt pawh 2.23 lakh ziakin an dawng a, tum 60 meeting neihpuiin draft siam nana mihring an kawm leh kohkhawm zat chu 60,000 vel nia sawi a ni.
UCC hman intiamna hi kum 2022 Assembly inthlana BJP te chakna chhan ber pakhata sawi a ni a, chu mai bakah kum 2000 atanga state ni chauh Uttarakhand-a a zawna term hnih chelh thei party awm chhun an ni bawk.
Uttarakhand in sawi hlawh UCC hman thuai tum
