Vaccine hrang hrang pek dan thlirlet
Natna hrileng inkaichhawn theih laka naupang leh nu naupai laite invenna damdawi – vaccine lak chungchanga state pum huapa hma latu, Committee State Task Force on Immunization (STFI) chu an chairman, Health commissioner & secretary H Lalengmawia hoin Zirtawpni khan an thukhawm.
State chhunga hri danna pek hna – Universal Immunization Programme (UIP) hmalakna thlirlet a ni a. Report-a a lan danin, kum 2024- 2025 chhunga target 90% dah a nih lain 95% pek a ni a. District ang chuan Siaha, Kolasib leh Lawngtlai ten 90% an la tlin lo a ni.
Vaccine la loten an lak loh chhan zingah – vaccine pawimawhna hriatchian tawk loh vang, vaccine lak tirha khawsi adt. a awm theih thin avanga hreh phah, injection nawn ngaih avanga lak hreh vang, social media lama intihthaihna vang, thawktu indaihloh leh kalpawhna that tawk loh avang chu a langsar zual a ni.
National Health Mission Mizoram mission director Dr Lily Chhakchhuak sawi danin, UIP hnuaiah natna chi hrang 11-ah hri danna pek a ni a, state dangah natna hri 12 huam mah se, Mizoram bikah chuan Japanese Encephalitis natna hri a len ve loh avangin telh a ni lo.
Directorate of Health Services deputy director (EPI) Dr Malsawmtluangi Ralte chuan presentation pe in, natna hri Measles-Rubella bikah Mizoram chu hri danna pek kawngah a ti tha a. Hospital pali – Civil Hospital Aizawl, Zoram Medical College, Sub-Divisional Hospital Kulikawn leh Integrated AYUSH Hospital record atanga a lan danin, kum 2023 khan case 15 awmin, 2024-ah case 34-ah a chho. Kumin June thleng khan case 2 chauh hmuhchhuah a la ni.
Vaccine hrang hrang pek dan thlirlet
