Naupang leh nu nau paite hnena natna tlanglawn kai theih laka invenna damdawi (vaccine) pek beihpui thlakna, Intensified Mission Indradhanush (IMI) 5.0 chu September 11-16 chhung hian neih a ni leh dawn.
Lunglei District Task Force for Immunization (DTFI) chu hemi chungchang rel hian Nilainin khan an thukhawm a. Naupang kum 5 hnuailam leh nu naupaite hnena natna hri laka invenlawkna vaccine pek beihpui thlakna thawhhnihna hi Lunglei leh Hnahthial district pumah karleh chhung hian kalpui tum a ni. Lunglei leh Hnahthial district chhunga PHC/ SDH/ CHC/ MC 15 hnuaia khaw 94 ah vaccine pek beihpui thlak tura rel niin, ruahman dan chuan IMI 5.0 thawh thumna hi October 9-14 a neih tum a ni. Vaccine la thei turte dapchhuah mek niin, ral tlante telin hmaih awm loa vaccine pek a nih tur thu sawi a ni.
DTFI Lunglei tarlan danin, tunah hian Lunglei leh Hnahthial district-ah naupang vaccine la thei kum 1 hnuailam 290, kum 1-2 inkar 149, kum 2-5 chin 182 leh nu naupai 128 an awm a. Hei bakah hian MR-1 121 leh MR- II 150 (Measles Rubella) hnenah vaccine pek vek tur a ni. IMI 5.0 thawhkhatna hi August 7-12 chhung khan neih a ni a; fur ruahtui tlak tam lai a nih avangin leimin leh tuilian avanga inkalpawh harsat thu sawi a ni. Tlabung SDH hnuaia khaw thum leh Hnahthial CHC chhunga khaw khatah vaccine hi pek a ni a, a pumpuiah zaa 13 chauh tuam hman a ni.
Vaccine pek runpui nei leh dawn
