National Health Mission hnuaia vaihlo do kawnga hma latu National Tobacco Control Programme (NTCP) Mizoram chuan intuaithar pahin hnathawh thlirletin Ningani khan Aizawlah an thukhawm a. District hrang hrang atangin NTCP thawktute an tel.
National Health Mission mission director Dr Eric Zomawia chuan NTCP hmalakna hrang hrang a la hlawhtling vek rih lo a nih pawhin, tih dan dang hmanga hma lak chhunzawm a tangkai tih a sawi a. Vaihlo do kawngah pawh chhungkua atanga hma lak a pawimawh tih a sawi.
Inkaichhawn theih loh natna – non communicable disease (NCD) hrang hrang thlen theitu langsar ber chu vaihlo zuk leh hmuam hman a ni, tiin, cancer natna zinga zaa 30 leh NCD nei zinga zaa 30 chuan vaihlo zuk leh hmuam an hmang thin tih a sawi a ni.
NTCP state nodal officer Dr H Lianthangpuia chuan NTCP-in vaihlo dona kawnga hma a sawn zel theih nan kohhran hrang hrang nen thawhho a pawimawh tih sawiin, thawhho pui tura hma an lakna a sawi nghal a ni.
District hrang hrang report ngaihthlak a ni a, sawrkar kum kalta hna an thawk tha tih sawi a ni. Target an neih an khum tha a, hma an lakna kawng hrang hrangah an ti tha tih report a ni. Hma lak zel dan tur sawi ho a ni bawk.
Vaihlo do kawnga hnathawh thlirlet
