Lalchhandama Colney
Ph – 9862982321
Mi pangngai chin hi chuan vaihlo leh a kaihhnawih chanchin an sawi hi chu kan hre tlang hlawm viau tawhin ka ring. Mi ramah te pawh a that lohzia an hre chiang, chuvang chuan an hmang duh tawh miah lo, a tih theih a ni. Mahni inthiam nan, keini chu kan pipute hun lai atang tawhin kan hmang thin alawm, eng nge a pawina, tun ataka chutia han tih te chu kan ti mai thin. A thatlohzia an hriat chhuah hma hi chuan sap ramah te pawh an uar hle, mahse, tunah chuan thil tha lo tak, hlauhawm tak a ni,tih an hre tawh a ni. A thatlohzia kan hriat hnu pawh hian keini chu kan ngai pat reng tho, kan awih tak tak lo nge ni. Hei vang hian vawiinah hetiang thupui – Vaihlo hi a tha lo? tih hi han hman thain ka hre ve a ni.
Mizote
Tun hma khan mipa tawh phawt chuan meizial zuk tur emaw kan ti a, hmeichhiate pawh khan, khaini, sahdah, hmuam ngei tur ni khan kan hre bawk. Ti ve ngai miah lo chu, mi thing, changkang lo, tunlai lo, an ni. Hetiang tak hian kan nunah a awm nghet in, min bawih hneh hle. Hun alo kal deuh a, ti ve ngai lo ang chi ho kha chu a tlangpui thuin an ding chhuak, veng khat, khaw khatah, parawn, nu fel, an lo ni thin. Hetia a thatlohzia kan lo hriat ve hnu pawh hian mi tam tak rilruah chuan a chiang hlei thei lo, chuvang te pawh chu aniang thalaite pawh hian kan la uar hle mai. Damlote kan kan a, na tuarin an lo awm, kan va hmu ve reng chung hian, kan zu a, kan hmuam a, kan ei reng tho. Cancer natna bakah kan taksaah thil tha lo tak tak a thlen thin a ni, tih kan hre ve reng tho, mahse, kan ngai reng tho. Kan Chiang Em
Kan vawiin dinhmun han en vang vang hi chuan,sahdah hmuam thin,tuibur hmuam thin, mei zu thin hi an tam mang e aw, ka ti. Mipa tleirawl ho lah hian an zu pet pet hlawm vek tlat mai, ti ngai miah lo hi chu ka hmu ngai mang lo. Mihlui lam phei hi chuan an ti vek tlangpui. Chhiarpui, data, lam hi ka hre chiang vak lo a, hetia han en mai hi chuan mi tu pawh mai hi, a zu mi, hmuam chi, an ni duh khawp mai.Hman deuh kha chuan a thatlohzia tarna hi a awm fer fur thin khan ka hria a, tunah chuan a awm ta mang lo, ni berin ka hria, a vaitu lam hote pawh hi an reh deuh hrih tlatin ka hria. Pu Hawla (CM) sawrkar lai kha chuan nasa taka do, zirtirna (Awereness)te pawh kha pek thin a niin ka hria.Engpawhnise, vawiinah Mizote kan chiang em aw, chian viau tho i tum teh ang u. KaThil Tawn
Kum tir (January) khan khua te a vawt, kan inkhar up ang reng hle, meizu ngai vak tawh lo thawhpui pakhat chuan, a zu khu ta tulh tulh mai a, kan hau ve a, rin ai khan boruak a tang ta tlat mai a, kei zawk chu mi ti ta deuh hrep mai a, buaithlak ang reng khawp, mahse, a hnu lamah chuan a mei khup zawkah a tang ta a.
Tun thla mai pawh hian thil danglam ang reng deuh mai ka tawng leh a. Thawhpui pakhat hian tuibur a hmuam thin a, hawihhawm takin a rim hriat phak tawh lohna turah a chhak thin ang chu ka ti a. Mahse, a thutna bul bawlhhlawh bawm (Dustbin)-ah chuan a chhak thin ta mai a, a rim leng vel thin chu, a chhe khawp mai. Bawlhhlawh bawm chu kan post ta ngat a, mahse, kan pi chuan keimah zawk chu min rawn ti ta hrep mai a, a ngaihdan a sawi chu – thil kan ei a, kuhva kan ei leh a, kan zu a, tuibur-te pawh, inngaihtheihloh viau hi a tha lo, a ti. Hetiang ngaihdan hi ka vawi khat hriat ve na deuh a nia. Vawiin thlengin zuk leh hmuam hi kan la uar em em reng tho, a chhan eng nge ni ang, sawi tur chu kan nei nual hlawmin ka ring. Hetih lai hian khawhar-in, damdawi in, office leh vantlang hmun dangah te chuan kan fimkhur ve viau tawh mai, a lawmawm hle mai. Tun hma kha chuan a thatlohna hi hriat a la ni em em lo a, vawiinah erawh kan hre hlawm tawh viauin ka ring.Mei zu, sahdah, tuibur, tuna la ti mek then khat hi chu, sim duh, tih tawp duh, mahse, ti hlei thei lo, hrehawm ti ve em em te an ni hlawmin ka ring. Vaihlo thlavang lo hauh viau kan han sawi te pawh hi an tum loh daih sawi palhah ngai ila, a la ni lo, a nih leh an bpl ve deuh-below standard level, ti ve ta mai ila, a tha awm e; nih loh chuan thil zahthlak lutuk, mimawl tawp, an ni ber mai e.
Nia, keia han hmuh ve dan atang chuan, inzirtirna (Awareness) hi kum khat chhung hian tum hnih vel tal hi neih theih ziah ni se, tichuan, Mizote hian ngaih pawimawh tak tak hun kan la nei ve mai thei asin.