Vairengte ah inpumkhatna pual
North East Zone Cultural Cenltre (NEZCC) Dimapur, sawrkar laipui Ministry of Culture leh Mizoram Art & Culture department tangho buatsaihin India rama hnam hrang hrangte inpumkhatna leh hnam ziarang inhriatpawh tawnna leh chawilarna ‘Bharat Ko Jano’ programme chu Nilaini khan Vairengte-ah hman a ni a. Mizoram larsap Dr Hari Babu Kambhampati leh NEZCC chairman, Nagaland larsap La Ganesan ten an hmanpui.
Mizoram larsap chuan ramri dep Vairengtea chengte chu remna leh muanna vawnnun kawnga mawhphurhna pawimawh tak nei an ni, tiin, muanna, rinawmna leh mikhual chunga that chhuah kawnga Mizoram dinhmun chawinungtute an ni tih a sawi.
Bharat Ko Jano campaign chu zau zawka kalpui a nih theihnan theihtawp chhuah tura chahin, India ram chanchin, midangte hnam ziarang leh tihdan phung zira India ram hnam ziarang hausakna ngaihlu thiam turin a fuih. North East-ah ringawt pawh hnam peng hrang 200 leh tawng hrang 220 chuang a awm tih sawiin, “Hnam ziarang leh nunphung inhriatpawh tawnna chu kan inpumkhatna tinghettu pawimawh tak a ni,” a ti.
Nagaland larsap chuan hmarchhak chu India tana chet lak vel nana hmun pawimawh tak, India ram hnam ziarang hrang hrang awmna leh India chanchina thil pawimawh tam tak thlenna leh awmna hmun a ni tih a sawi a. Hun hman chu hnam ziarang leh tihdan phung pholanna piah lamah, ramri depa inpumkhatna leh hmasawnna thlen nana duan a ni tih a sawi.
Bharat Ko Jano programme-ah hian Mizoram, Assam, Tripura leh Bihar atangin lamthiamten hnam lam chi hrang hrang an entir.
Vairengte ah inpumkhatna pual
