Vairengte kawng leh Airport
kawng siamthat thuai an phut
Sairang to Vairengte inkar kawngpui leh Lengpui Airport panna Sihhmui kaia Tlawng lei dawh mek bul kawngpui tlan harsa khawpa la chhia chu siamtha thuai turin sawrkar a phut tih Congress hruaitu Dr Lalmalsawma chuan a sawi.
MPCC treasurer Dr Lalmalsawma Nghaka hian Ningani khan heng kawng pahnih hi a enfiah a. Mipuiin sum lamah harsatna an tawh nasat dawn avanga sawrkar kal tawhten kawngpui enkawlna tura chhiah an lak ve ngai lohna, road maintainace cess chu ZPM sawrkarin la mah se, tunhma zawng aiin Mizoram kawng a chhe zawk a, hei hi mipui zah lohna lian tak a ni tih a sawi.
Congress sawrkar laia Aizawl to Kolasib darkar hnih vel tlan thin kha, tunah chuan tlang kawng (via Siphir) atanga Kolasib kal tur pawhin lirtheite pawhin darkar 5-te hun hman a ngai ta hial tih a sawi a. ZPM MLA-ten tul dang kalsan hiala Kawnpui to New Khamrang kawng siam pawh a inchhawka an vil chungin hmasawnna hmuh tur a beitham hle tih a sawi a ni.
Lengpui Airport panna kawng Sihmui kai pawh thawmthat a ngai hle tih MPCC hruaitu hian sawiin, “Tlawng lui kai lei bul vel hi a chhiat nasat avangin lirthei tan tlan a harsa hle. Ruah a sur phei chuan intlan chhawk a ngaih avangin rei tak chhung innghah a ngai a. Sihhmui-a Tlawng lei thar hi dawh zawh tawh ni mah se, tun thlengin hman theih a la ni loa, lei hlui zawka kal a la ngai. Lei hlui zawk panna kawng hi thawmthat thuai a nih loh chuan kawng hi a chhe lutuk a, zin veivak leh mipuiin harsatna an tawk mek a ni,” a ti.
Vairengte kawng leh Airport kawng siamthat thuai an phut
