Vairengte – Sairang inkar
4-lane kal dan tur inhrilh
Bharatmala Pariyojna hnuaia NHIDCL kaltlanga Kolasib district-a 4-lane kawng laih tur chu hna an tan hnai a, Thawhtanni khan a kaihhnawih sawrkar department leh khawtlang aiawhte hriat tur tul inhrilh a ni.
Kolasib district bawrhsap John LT Sanga kaihruaia thutkhawmah hian Turial bialtu MLA K Laldawngliana, Kolasib district-a Public Works Department, Public Health Engineering Department, Power & Electricity Department, Divisional Forest Office hotute telin Kawnpui, Khamrang leh Mualkhang khawtlang hruaitute an tel bawk. NHIDCL Project Management Unit Kolasib thawktuten 4-lane kawng kal dan tur powerpoint presentation hmangin an entir.
Bawrhsap chuan nitin kan nunphungah leh eizawnna dapna kawngah hmasawnna awm tur chuan inkalpawhna tha neih a pawimawh hmasa tih sawiin, 4-lane kawng chuan Kolasib district-ah hmasawnna nasa tak a thlen a beisei tih a sawi. Hna thawh tan thuai a nih theihna’n leh hna tan huna leivung paih kawngah te, tul loa ram leilung tih chereuna a nih lohna’n leh a nih dan tur ang taka kawng tha kan neih theihna’n sawrkar leh khawtlangin vilpui a pawimawh tih a sawi a ni.
Bharatmala Pariyojna hnuaia 4-lane siam tura package 3, 4, 5, 6 leh 7 hian Kolasib district a paltlang dawn a, Vairengte leh Sairang inkar kawng thui zawng hi km. 111 niin, kawng thar siam tur hi km. 90.25 a thui a ni. Kawng kal dan tur ruahmanna hi siamfel tawh niin, Mualkhanga lei metre 500 chu lei dawh zinga sei ber tur a ni a, lui luang tibuai lo tur ang berin ruahman a ni a, kawngsira thing phun dan tur ruahman tel a ni. Leivung dahkhawmna tur engemawzat endik a ni a, lirthei lian tana zawh nuam tura zala siam tum a ni. Sairang chhaka lirthei intawhkhawmna junction ruahman dan pawh sawifiah a ni a. Toll booth dah tum a ni loa, hna hi thawh tan a nih atanga kum hnih chhunga zawh tura beisei a ni.
Vairengte – Sairang inkar 4-lane kal dan tur inhrilh
