Mizoram chak lakna kawngpui, Vairengte leh Sairang inkar kawng chhe zual thawmthat ran dan tur leh four lane tura hnathawh tan thuai dan ngaihtuahin Zirtawpni khan chief minister Lalduhoma hoin thutkhawm a ni a. PWD minister Vanlalhlana, adviser to CM TBC Lalvenchhunga leh hnathawh tur kaihhnawih department hotute an tel.
PWD minister hian kawngpui thawmthat a tul tawh zia, mipui mamawh phur thin Truck Owners Association pawhin chief minister hnena an thlen tawh thu leh fur a lo thlen leh mai dawn vanga hmanhmawh a tul thu a sawi a. Hma lak nghal dan tur sawizui a ni.
NHIDCL lamin an chanpual chin chu fur hmaa a tul zual an khawih theih tur thu an sawi a. Forest clearance a fel chuan four lane hna pawh an tan nghal dawn tih an sawi. PWD pawhin an enkawl chin chu a chhiat lutuk loh thu leh a tul zual lai an khawih nghal tur thu an sawi. Council of Minister thukhawmin a ngaihtuah zui ngai thil chu Council of Minister thutkhawm hmasaberah agenda-a dah peih hman tum a ni bawk.
Vairengte to Sairang kawng thawmthat ran dan ngaihtuah
