Vairengtea kuhva tawlhruk man tak phurtu zawng mek

Vairengtea kuhva tawlhruk man tak phurtu zawng mek
Tunhnaia Vairengte-a dan loa tawlhruk Burma kuhva rah ro engemawzat man phurtu mi pali zinga pathum chu man an ni tawh, pakhat hi zawn mek a ni.
Sawrkar thuchhuah danin, Taxation Data Collection Centre Vairengtea official-te chuan 2025 April 10 zing dar 1.28 khan chhiah awlruk tuma U/S 129 of GST Act 2017 palzuttu kuhva rah ro phur truck pali chu highway-a an tih din thu asst commissioner of State Tax Lalhmachhuana chuan ziakin Vairengte Police Station-ah a thlen.
Truck, a khalhtute leh kuhva rah an phurh zat chu – Hauchinkhupa, MZ 04 9474 (bag 110), Ngaihkhuala, MZ 04 A 0306 (bag 85), Hmangaihsanga, MZ 04 A 3464 (bag 111) leh Liankima MZ 04 A 6509 (bag 105) a ni.
Truck pali hi Tax official-ten an endik hnuah Burma atanga lakluh kuhva rah ro an phur ngei tih finfiah a ni a. Hemi bawhzui hian Vairengte police chuan Taxation Data Collection Centre an pan a. Truck khalhtute hi an truck kalhin an lo tlanbo vek a. Truck leh an thil phurh hi Taxation department kuta dah a ni.
Driver tlanbote zawn hna thawh zui a ni a. April 14 zing dar 4.30 khan driver pali zinga pathum – Hauchinkhupa (22), Kawlbem Saitual district (MZ-04 9474), Haungaihkhuala (39) Champhai Dinthar (MZ-04 A 0306), Hmangaihsanga (40) Champhai Venglai (MZ-04 A 3464) chu man an ni. A dang pakhat – Liankima, Champhai Bethel Veng (MZ 04 A 6509) chu a awmna chin hriat a la ni lo.
Hriatpuitute awm lai leh hmuh laiin Burma kuhva rah ro leh a phurhna hi man a ni a. Heng kuhva rah ro hi Champhai atanga phurh, Bagha lama phurh thlen tur tih hriat a ni.
Truck khalhtute leh an thil phurh Burma kuhva rah ro hi dan anga hma lak chhunzawm a nih theihnan Kolasib district magistrate hnenah police-te hian an thlen.