Vaitin pa pahnih chin hriat loh

Aizawl district-a Vatin khaw mi pahnih chu luia sangha mana an kal an chin hriat zui a ni loa, khawtlangin an zawng mek.
Thudawn danin, Vaitin pa pahnih – Vanlalhnuaia (28) h/o Lalhmunruati leh Lalditsak (32) h/o Sawmkimi te chu tunkar Nilaini – January 8 chawhnu lam khan Tuiriang luiah sangha man tumin an kal a, tlai chaw tur an ken bak an inkeng lawk loa, a tuk zingkar lama haw leh mai tum an ni. An chin hriat zui a nih loh laiin, helai bula balu late chuan lui kamah an ipte leh sangha man sa mauthei pahniha awm chu an hmu a, chawhnu lam thlengin an hmel hmuh tur a awm lo bawk nen, an chhungte chuan khawtlang hruaitute an pun a ni.
Ningani zan khan khawtlangin a zawn hna an thawk tan a, Zirtawpni khan Vaitin khawtlang bakah an khaw chhehvela khaw dangte pawhin an zawnpui tan a ni.
Tuia chesual an nih palh takin tiin, a thlang lama suar awm rilrua awm chungin hemi thlang daih hmun hnihah buk an sual a, tuiah an tla a nih pawha an ruang lo dangtu tur an ruahman nghal a ni.