India sawrkarin zirna in tinah ‘Vande Mataram’ sak emaw ngaihthlak emaw vek tura a tih chu Mizo Zirlai Pawl chuan India danpui hnuaiah Mizote vohbikna palzutna a ni, tiin, a tul anga hma la turin Mizoram Legislative Assembly a ngen tih a sawi.
MZP president Dr C Lalremruata chuan, Ministry of Home Affairs-in sawrkar function leh zirna in hrang hrangah India ram hla sak emaw ngaihthlak emaw tura ti thupek a tichhuak chu ram leh hnam, sakhua ngaihtuah chungin tha a ti lo hle tih a sawi a. Mizoram chu India Constitution-a Article 371(G) hnuaiah vohbikna lian tak nei; Mizo hnamzia, nunphung, sakhuana leh customary law humhalh tlat a nih lai a, inrawnkhawm mumal awm lo leh mipui rilru tur ngaihtuah loa school, college leh sawrkar office-a Vande Mataram ngaihthlak emaw sak emaw tura tih hian ngaih a ti tha lo tih a sawi.
“India danpui hnuaiah Mizote vohbikna leh humhalhna dan palzutna niin kan ngai a. He thupek hi India danpuiin Mizoram a humhalhna dan a nghawng theih dan zirchiang a, a tul anga hma la turin Mizoram Legislative Assembly kan ngen a ni,” a ti.
Zirna in chu zirna atana hman a, hriatna leh thiamna kawnga hma min sawntirtu tur a ni tih MZP president hian a sawi a. Inrawn khawm mumal awm loa zirna leh hmasawnna tura tangkai tur ni lem lo, barhluih ang maia zirna in chu hman chi ah an ngai loa, chutiang tur chuan MZP chuan a phal lo bawk tih a sawi.
Mizoram sawrkar, zirna chungchanga thuneitute leh zirna in ho pawh, Vande Mataram sak emaw ngaithla emaw tura hriattirna chu, India rama Mizoram dinhmun diktak ngaihtuah chiang a, Mizoram sawrkarin hmalakna mumal tak a awm hma chuan tihlawhtling rih lo turin an ngen tih a sawi bawk.
MZP chuan Mizote hnamzia leh nunphung humhalh a, zirna in chu politics tuinu leh barhluih sakhaw thil atan hman a remti ngai dawn lo tih Dr C Lalremruata hian a sawi a. Mizoram Legislative Assembly-a an ti thin anga, Mizo hnam hla “Ro Min Rel Sak Ang Che” tia sak emaw ngaihthlak emaw theihna tura hma la zawk turin thuneitute leh Mizoram sawrkar an ngen nghal tih a sawi a ni.
Vande Mataram barh luih duh lo
