Vanthengrengah Katy Perry a zai
Blue Origin hmeichhe hlang vanthengreng zin te chu him takin Lei-ah an rawn tum leh ta a, New Shepard capsule atanga a rawn chhuah veleh Katy Perry chu thingthiin lei a chuks zauh, hetiang hian Gayle King pawhin him taka rawn tum leh hnuah lei a chuks ve zauh bawk.
April ni 14 zan khan Blue Origin New Shepard hi Texas atangin an kapchhuak a, he rocket-ah hian hmeichhe hlang an chuang a, Blue Origin neitu Jeff Bezos a nupui hual Lauren Sanchez, Katy Perry, Gayle King, NASA rocket scientist thin Aisha Bowe, civil rights activist Amanda Nguyen leh film producer Kerianne Flynn te an ni.
An paruk hian New Shepard capsule a leng tawk chiah an ni a, vanthengreng-ah minute 4 vel an an awm a, Lei atmosphere leh vanthengreng inrina Karman Line pelin, Lei hipna awm tawh lohna hmunah reilote an han tal ve zuai a ni.
Gayle King hi thlawhtheihna chuan pawh hlau thin a ni a, mahse, tuna vanthengreng an zin chu a inchhir loh thu sawiin, “Khitah chuan thawm a reh ruih mai a, kan planet hi chunglam atangin kan tlir thla a. Ka ngaihtuah tak chu kan planet hi kan duat lehzual a ni,” a ti.
Gayle King chuan vanthengreng an thlen hnuah Katy Perry chuan Louis Armstrong hla ‘What a Wonderful World’ a sa niin a sawi a, hemi chungchang hi Katy Perry an zawh chuan, “He hla hi tunhma pawhin ka lo cover tawh a…vanthengrengah he hla hi ka sa ang tih pawh ka la suangtuah phak ngai loh a ni. Hmeichhiate hun lo kal tura hmun lo buatsaihna a ni. Heng zawng zawng hi Lei tana lawkna tur a ni,” a ti.
Katy Perry hian a vanthengreng zinnaah hian daisy pangpar a keng tel a, “Daisy hi pangpar common a nia, mahse, eng hmunah pawh an to thei. Kan Lei mawi tak leh kan chhehvela thil ropui tak tak min hual veltu min hriatchhuah tirtu a ni,” a ti.
New Shepard hi American zinga vanthengrenga zin chhuak hmasa ber, 1961-a zin chhuak Alan Shepard hming chawia an phuah a ni a, Blue Origin chuan he capsule hi vanthengreng zin nan hman nawn fo theih tur niin an tarlang. Mi paruk chuan theihna niin, pilot a mamawh lo va, ama tawka inkhalh thei (fully autonomous) a ni.
Vanthengrengah Katy Perry a zai
