Vawiinah MBA Official Championship tan dawn

Vawiinah MBA Official Championship tan dawn
Season khat chhunga Mizoram huap badminton inelna ngaihhlut ber leh lian ber Mizoram Badminton Association Official Championship 2023 (Senior) chu vawiin atang hian tan a ni dawn a, July ni 29 thleng a awh ang.
Mizo badminton player thate chu inlan kim hle tura ngaih niin, category panga – men’s singles, women’s singles, men’s doubles, women’s doubles leh mixed doubles-ahte inelna buatsaih a ni ang.
MBA-in ranking system a kalpui danah official championship hian double point a pu a, lawman sumfai tamna ber tournament a ni tel bawk.
An rawn haw khawm e
State championship hi ngaihpawi-mawh a nih avangin Badminton Asso-ciation of India (BAI) pawhin calendar-a a dah a ni a, Mizoram pawna badminton zir mekte pawh he tournament khel tur hi chuan an rawn haw phalsak a ni. Chuvangin Pullela Gopichand Badminton Academy (PGBA) leh ITM University Badminton Academy-a zirlai Mizo naupangte pawh he tournament khel tur hian an rawn haw khawm.
Tin, MBA-in a thawhpui Tata Trust lam leh PGBA-te’n Mizo naupang badminton zir mekte training lama insawrbing tura an duh avangin season khatah state level tournament pakhat bak an khelh a rem tawh hrih dawn lo niin a lang tel bawk a, chuvangin, he’ng academy-a Mizo player-te hi an khelh chak ber official cham-pionship khel tur hian an rawn haw khawm a, an chevel leh inelna an hmachhawn lai tun tournament-ah hian kan hmuh thei dawn a ni.
Under-17 boy’s singles category-ah All India Sub-Junior Ranking Badminton Tournament-a kumin chhunga vawi hnih champion thei H. Lalthazuala, Ralte Villa Badminton Club pawh men’s singles huangah a inlan dawn a; tin, Under-15 category-a vawikhat national champion ni a, vawikhat dang final lut thei Malsawm-hlua, Ralte Villa BC pawh men’s singles leh men’s doubles huangah a inlan ang.
Anni bakah hian Lucknow khuaa khelh zawh taka under-17 boy’s doubles semi-finalist C. Lalramsanga, Ralte Villa BC pawh he’ng category pahnihah tho hian a inlan dawn bawk a ni.
A hmuhnawm dawn
Mipa lamah Malsawmsanga (Esha), Bawngkawn Badminton Club (BBC) chuan seeded no 1 ni chungin inelna hi a hmachhawn dawn. MBA-in ranking system a siamah pawh Esha hi men’s singles category-ah tunah hian a chung berah a awm a; first round khelh ngai loin a bye-a, |hazuala’n first round-ah a tumpui a hneh chuan second round-ah anni pahnih hi an intum ang a, Mizoram men’s singles number one leh India under-17 number one-te inkhel kan hmu thei dawn tihna a ni.
Men’s singles category-ah hian entry 60 ngawt mai a lut a, Mizorama badminton player tha zawng zawngte chu an inlan kim vek dawn a, a hmuhnawm lo thei lo.
Women’s singles-ah Abigail Laltha-zuali, Saron veng Badminton Club chuan seeded no 1 ni chungin tournament hi a hmachhawn dawn a; Lalrinhlui, Ralte Villa Badminton Club chu seeded no 2 a ni.
Women’s singles inelna hmachhawn turte hi an naupang seng sawng hle a, kum 15-22 inkar an ni hlawm.
Men’s doubles-ah Laldintluanga Tlau leh Lalrinawma (BBC)-te tangdun chu seeded no 1 an ni a, tun dinhmunah Mizorama tha ber anga chhal ngam ni mah se tunhnai lawka district level tournament-a an hneh zawh loh Subam Yadav leh Steven Lalhriatpuia, Chanmari Shuttler Club (CSC)-te an line ah an awm a; tin, C. Lalramzuava leh Joseph VL Ringngheta, CSC-te seeded no 2-ah awmin, senior player chuai thei lo Lal-muanawma leh Samuel Lalnunmawia, Mizoram Police BC-te seeded no 3 an la ni bawk. Anni ho hi Rinawmate thiandun champion kawng daltu ni thei thiau an ni.
Women’s doubles category lamah senior player hmel kan hmu nual dawn a, chuti chung chuan Lalrinhlui leh Zothansangi, Ralte Villa BC-te tangdun chuan seeded no 1 dinhmun an hauh.
Mixed doubles huangah Laldin-tluanga Tlau, BBC leh Zorinkimi, Chal-tlang BC-te seeded no 1 ni chungin an hmel kan hmu dawn bawk a ni.
Pafaa tournament hmachhawn tur
He tournament tingaihnawmtu chu Malsawmkima (Maski-a)-te pafa za, Mission Veng Badminton Academy-in offi-cial c’ship an hmachhawn tur hi a ni.
Maski-a hi kum 53 mi a ni tawh a, a fapa kum 13-a upa Vanlalhriatrenga nen men’s singles category-ah an inlan dun dawn. He tournament-a tel thei upa ber leh naupang ber an ni nghe nghe. A fanu Lalrinkimi chuan women’s singles inelna a hmachhawn dawn bawk a ni.
Heti’anga pafa zaa MBA official tournament thuhmun khelho thei an ni hi Mizoram badminton chanchina thil chhinchhiahtlak tak a ni awm e.
Kan vannei em e!
He tournament hi Mizoram Badminton Association leh Bawngkawn Badminton Club tangdunin an huaihawt a ni a, Bawngkawn YMA Hall-ah chhun lamah khelh thin a ni ang. Mipui te tan a hmunah en theih a ni a, entry fee a awm dawn lo!
India ram level-ah pawh anmahni category-a player tha ber ber ni chho tan mek, hmabak nei eng em em mai Mizo rawlthar leh tleirawl rual chetla vel man nei loa kan en thei tur hi kan va vannei tak em!
Mizoram Badminton Association chuan Mizo mipuite he tournament chhim a, a hmuna en tur hian a sawm vek a ni.