Vawiinah Mizoram huap Mock Exercise nei dawn
Sawrkar laipui-a National Disaster Management Authority (NDMA), Mizorama State Disaster Management Authority (SDMA) leh District tina District Disaster Management Authority (DDMA) te huaihawtin vawiin hian district tin khawpui-a hmun thlan bikahte State Level Mock Exercise on Earthquake Disaster neih a ni dawn.
Hei hi Mizorama lirnghing a thlen huna chhiatna a thlen thulha inpuahchah dan tur mipui inzirtirnan te, chhiatna thleng thei hmachhawn tura lo inpuahchahna tuaihriam nan te, chhiatna lo thlen thulha hmachhawn dan thiam nan te, chhiatna kaihhnawh department hrang hrang ten an hmanrua theuhte an hman thiam leh thiam loh en nan te, an tihtur theuh te an chian leh zual nan te, midangte nena thawh ho that leh zual nan te, tlakchham leh hmaih palh te, hmasawn ngaihna lai hriat chhuah a nih theihna atana ruahman a ni.
Mock Exercise hi vawiin chhunah leh tlai thim hlimah Mizoram hmun hrang hrangah chhiatna thlena mipui hriattirna tur ralkhel dar (Siren) ti riin rikrum thulha che vel thin thuneitute, department hrang hrang mi leh sate leh lirthei hrang hrangte an veivakin an phusa dawn a, Mizorama Sipai/Paramilitary awm ang angte an tel dawn bakah Kolasib leh Mamit district ah phei chuan thenawm Assam leh Tripura state-a an State Disaster Response Force te an lo kal dawn a ni.
He hun hmang tur hian National Observer pali an lo kal a, State-ah pawh Observer pahnih leh District-a Mock drill neihna hmunah Observer-te an awm vek dawn a, zaninah mock drill thlirletna (Debriefing) hun pawh neih nghal tura duan a ni.
Hemi Mock drill hi lirnghing tur hrilhlawkna (prediction) ni lovin lir lo nghing palh thei hre chunga (Scenario) chetlak dan enchhinna a ni tih hriaa mipuite lo chiai lo tur leh thudik lo vawrhdarh lo tur te, lo tawiawma thawhpui turin thuneituten mipui an ngen a ni.
Mizoram leh India Hmarchhak pum mai hi India rama lirnghing nasa tak thlen theihna, Seismic zone 5-ah a awm thin a. Tuna Bureau of Indian Standard (BIS) in Seismic zonation a tihchhuah thar berah chuan lirnghing na tak thlen theihna Zone 6-ah India Hmarchhak pum hi a dah thar a ni.
Vawiinah Mizoram huap Mock Exercise nei dawn
