Asian Games hmeichhe hockey gold medal awrhtu Indian women’s hockey team player pawimawh pahnih Lalremsiami leh Lalthantluangite chu vawiin hian Lengpui Airport-ah an rawn tum dawn a; Lengpuiah hian hmuahna hun hman a nih dawn bakah Thawhtanni tlai dar 3 atang hian R. Dengthuama Hall, Mualpui Salem Veng-ah CM Lalduhoma hoin chawimawina hun hman zui turin sawrkar chuan ruahmanna a siam a, gold medallist pahnih hmuahna leh chawimawina hun chhim tur hian Mizoram mipuite sawm an ni.
Mizo nula pahnihte hi chawhnu dar 1:30-a Lengpui Airport rawn thleng tura beisei niin, Chanmari via Hunthar, Treasury Square, Republic Veng leh ITI Venga kaltlangin R. Dengthuama Hall phurhluh an ni ang.
Siami leh Tluangite hi sumin a bawm chho zel a, Hockey India lamin player tin hnena cheng nuai 11 theuh a pek tur thu a puan hnu lawkah Mizoram sawrkar pawhin infiammite hlawhtlin dan mila sum pek tur a dahsa Mizoram State Sports Incentive Scheme (MSSIS) atangin Mizote zinga Asian Games gold medal awrh hmasaber pahnihte hi cheng nuai 25 ve ve pek an nih tur thu a puang.
Thenzawl Hockey Academy atanga Asian Games lawmman semna dawhsan chungnung ber luahtu Mizo nula pahnihte hian hei lo pawh hi sum leh paia hamthatna dang an la dawng zui zel tura ngaih a ni.
Zirtawpni zan Kakamigahara khaw final-ah Mizo pahnih telna Indian women’s hockey team hian si khat faiin champion lai China an hneh a, India nulate champion-na goal awmchhun hi minute 10-na lekah Siami vuakluh niin, India senior team tana game 200 a khelh tlinnaah Asian kockey-a inelna sang ber hnehna goal a thun.
Tarlan tawh thin angin, Siami leh Tluangite thiandun hi Mizo hmeichhe hockey player tha dangte ang bawkin Thenzawl Hockey Academy atanga inzirchhuak niin, international stage-ah pawh player zahpuiawm lo an ni chho ta hial a; Mizoram sawrkar pawhin MSSIS a duanchhuah behchhanin Asian Games gold medalist nih manah cheng nuai 25 ve ve a hlan dawn tih sports minister Lalnghinglova Hmar chuan a puang.
Asian Games Women’s Hockey tournament-a champion Mizo nula pahnih puala thutkhawmah sports minister hian Mizo player pahnihte sarwkarin a chhuan thu sawi chungin Thenzawla hockey academy lian lo tak atanga he hlawhtlinna sualchhuak thei an nihna hi an chhuanawm zual niin a sawi a, chief minister ho ngeia ropui taka lo hmuah tum a nih thu a tarlang tel.
Vawiinah Siami leh Tluangi chawimawi dawn
