Valencia khelmuala sikhat faia an tlawm hnu ni hnihnaah Pathianni khan Sevilla chuan an manager chhawr lai Javier Garcia Pimienta an ban a, La Liga lama match li zet a tlawm zawnpui avangin an head coach lakah zahngaihna an lantir zel thei ta bik lo ni berin a lang!
Nikum July thla mai khan Pimienta hi Sevilla chuan kum hnih chhung atan an senglut a, beiseina sang tak nen Quique Sanchez Flores thlaktu atan lalut bawk mah se seven-times Europa League champion hi La Liga table-ah 13-na daih an ni tawh a, game 31 khelh tawh atanga point 36 chiah an ruh zawh avangin season thara European football khelh phak beiseina a chau rawih rawih tawh a, relegation zone nena an inkar pawh point sarih chauh a ni tawh a, hniam lam pan zel hlauin an manager chhawr lai an ban ta a ni.
Sevilla club thuchhuah chuan Garcia Pimienta an rawih chhunga a hna thawh leh a professionalism avangin an fak a, a kal zelna turah duhsakna an hlan zui nghal.
Kum 50 mi Garcia hian Las Palmas chu kum 2022-23 khan top flight-ah kaipuiin, season khat dang La Liga kawtkaiah a champui zui leh a, club lian zawkin beiseina sang tak nen an sengluh hnuah beisei a pha zui ta lo a ni.
Kartawpah Sevilla-in Alaves an mikhual ang.
Vawili tlawm zawn hnua coach chhawr lai ban Sevilla
