Surgeon-te chuan thi mai tawh tur nun pawhsei nana vawk lung an vuah sak a, tun hi mihringa vawk lung vuah tum hnihna chauh a ni a. Vawk lung vuahsak a nih hnu lawkah damlo chu ni hnih hnu lekah chair-ah thu-in fiamthu a thawh thei tawh tiin Maryland doctor-te chuan an sawi.
Kum 58-a upa niin heart failure avanga nunna chan mai tawh tur niin hrisel lohna dang a neih avangin tih thin dan pangngai anga heart transplant tithei mai lo a ni, tiin University of Maryland Medicine a doctor te chuan an sawi.
“Tumahin an la hre lawk lo va. Tunah chuan beiseina leh dam zel theihna ka nei a ni” tiin Lawrence Faucette, Frederick, Maryland chuan a lung thlak a nih hmaa hospital-a video an lak tihchhuahah a sawi a. “Ka la thawk tek tek theih nan theih tawp chhuahin ka bei ang” a ti bawk.
Kar eng emaw zah chu uluk taka thlithlai tur a la nih rualin vawk organ pek a nih avanga Faucett-an tun dinhmuna harsatna a nei miah rih lo chu doctor-te chuan lawmawm an tih thu an sawi.
“Vawk lung hmang mek mihring ka be mek chu ka lu ka thing nar nar reng mai” tiin Dr. Bartley Griffith, vawk lung thlaksaktu ber chuan a sawi a. Doctor-te chuan ‘chona nasa tak an hmachhawn’ tiin a sawi bawk.
Maryland team-te hian nikum khan thi mai tura ngaih David Bennett lakah genetic siam danglam vawk lung chu David Bennett lakah an lo thlak tawh bawk a, kha kha a hmasa ber niin mahse thla hnih chauh a dam zui a ni.
Khawvel huapin taksa bung thlak tura human organs donation mamawh tawk a awm thei lo va. Nikum khan US pumah pawh heart transplant 4,100 chauh a awm thei a, indaih lohna a nasat em avangin damlo zingah pawh damrei thei ber tura ngaihte chauh thlaksak an ni.
Ran taksa bungte mihringa hman a nih theih nana hmalakna hi kum sawm tam kalpui tawh niin mahse mihring immune system chuan foreign tissue anga ngaiin a lo tichhe zel a. Tunah erawh scientist-te chuan vawk organ- te chu mihring organ ang thei ang bera siam danglamin hma an la zui ta zel a ni.
Tun hnai lawkah pawh scientist- te chuan vawk kal leh lungte chu mihring taksaah hman a nih theih nan zirchianna nasa zawk kalpuiin hei hi xenotransplants tih a ni.
Thil awlsam a ni hauh lo va, trial turu tak kalpui ngai a nih avangin Maryland researcher-te chuan Food and Drug Administration atangin phalnate pawh an lak hial a ngai a. FDA hnenah hian phek 300 a chhah document thehluh niin hmasawnna nasa tak erawh hmuh a ni thung.
Nikuma transplant kalpuiah khan scientist-te chuan vawk lung chhungah virus chikhat a lo biru tih an hmuchhuak a, tunah chuan chung virus-te hmuh a nih theih nan test tha zawk an nei thei ta a, chu mai bakah damdawite pawh an thlak danglam thei ta bawk a ni.
“Vawk lung mihringa tha taka a thawk thei hi thil mak a ni” tiin Dr. Muhammad Mohiuddin, Marylant team’s xenotransplantion expert chuan a sawi a. Mahse fimkhur a ngaih thu sawiin, “Engmah sawi lawk theih kan nei lo. Ni tin hnehna anga ngaiin hmalam kan pan zel mai a ni” tiin a sawi.
Tuna vawk lung an thlak ber hi Virginia-a inbun Revivvor, Blacksburg te pek niin genetic modification 10 lai tih a ni a. Vawk gene thenkhat paihin mihring zawka siam leh mihring immune system in a pawm theih that nan siam danglam a ni.
Vawk lung mihringah vuah hlawhtling
