MGNREGA thlakna atana hman, VB- G RAM G kalpui zawm zeltu thawktute chuan thla 5 chhung vel hlawh an la tawh loa, an la lo reng a nih chuan August 24 atang hian office hna an thawh chhunzawm theih tawh loh tur thu an sawi.
All Mizoram VB- G RAM G Employees Association (AMGEA) hian Thawhlehni khan Rural Development minister hnenah ziakin an harsatna hi an thlen a. 2024 March atang tawh khan an thawh hlawh hi a hun taka lak an nei meuh loa, thla thum- li dan velah an hmu chauh thin a; tunah phei chuan kumin March atang khan an thla hlawh hi an la hmu ta lo reng tih an sawi a ni.
Thla 5 hlawh la tawh lo chung hian an nitin office hna bakah Special Intensive Revision kalpui mek leh thildang khawih tel tir an ni a. Office kaina tur leh field-a chetchhuahna tur an neih tawh loh avangin, tunkar chhung hian hlawh an lak loh hi tihfel sak an nih loh chuan, karleh Thawhtanni – August 24 hian hlawh an lak fel hma loh chu, sum harsatna avangin hna an chhunzawm thei dawn tawh rih lo tih an hriattir a ni.
Hetihlai hian Rural Development & Administration department hotute chuan, VB- G RAM G employee-te hlawh tur hi August 6 khan release order tihchhuah a ni tawh a, tunah hian pek tura process mek a ni tih an sawi a ni.
VB- G RAM G hnuaia thawkten thla 5 chhung hlawh la tawh lo
