Vbch 14 hu MR bill Chhiarkawp

Sawrkar hnathawk, dik lo taka medical reimbursement bill tum, Mizoram State Health Care Society-in a hmuhchhuah leh si chu a hlutzawng cheng vaibelchhe 14 hu niin sawi a ni a, hei hi 2024-2025 chhung a ni. Health Care Society hian hmuchhuak lo ta se, Mizoram sawrkar sum cheng vbch 14 chu mi dik lote kutah a luang ral mai mai dawn tihna ni. Cheng vaibelchhe 14 hu luangral tur hi State Health Care Society hian an hum (save) tihna a ni nghal bawk.
He vbch 14 hu MR bill hi ngaihruatna (hypothesis) chhiarkawp hmangin i han chawk dawn chhin teh ang.
MR bill hi chawhrualin damlo pakhat atan cheng nuai hnih zel anga chhutin, sawrkar hnathawk MR bill-tu zat hi 700 zet an ni dawn tihna a ni. Chumi awmzia chu, sawrkar hnathawk mi 50,000 vel zinga mi 700 chu rinawm lo tih hriatchiansa an ni a. Sawrkar hnathawk zingah mi rinawm lo tih hriatchian sa 1.4% an awm, a tih theih bawk awm e.
Dik lo taka MR bill thehluttute hian anmahni kutzalin MR Bill hi an siam hauh dawn lo a, a tihpuitu an awm a ngai. Hei erawh hi chu, Health Care Society lamin MR dik loh dan an hmuhchhuah dan hi kan zuk hriatpui si se tawh loh avangin, MR Bill dik lo siamnaah hian tute nge inhnamhnawih tih hi hriatthiam a har tawh a, mahse a inhnamhnawih tur chin chu a rin hriat theih mai. Damdawi leina cash memo lem a tel a nih chuan, chutiang thila inhnamhnawih chi chu a lang mai a, medical certificate lem a tel a nih pawhin a inhnamhnawih tur chu a hriat leh mai a. Heng MR bill-te hi sawrkar damdawi in atanga siam nge empanelled private hospital atanga siam tam zawk tih pawh kan zuk hre ve thei lova, a pawimawh bera chu, mi rinawm lo 700 rual lo thawhpuitute nen chuan, dik lo taka MR bill siamnaa inhnamhnawih chu mi 800 rual an tling theiin a rinawm.
Hei hi MR bill dik lo kaihhnawihah mi dik lo inhnamhnawih engzat nge awm thei ang tih chhut fiamna chauh a ni a. MR bill ni lo, bill dangah pawh, hetiang thil hi a thleng thei a ni tih a lang chiang hle. Tunhma khan kum khat chhunga MR Bill atana sawrkar sum sen ral chu cheng vaibelchhe 170 vel tih a ni a, dik lo taka MR bill siam kha a awm ve nualin a rinawm.