VC House 300 chuang sak dilna thehlut
Village Council House sakna tur chu sawrkar laipuiah dil belh mek zel a ni tih Local Administration minister C Lalsawivunga chuan a sawi.
Assembly Session neih meka zawhna chhangtu LAD minister chuan sawrkar kum kalta, 2023- 2024 leh sawrkar kum kal mek 2024- 2025 chhungin sawrkar laipui ruahman – Rashtriya Gram Swaraj Abhiyan (RGSA) Scheme hnuaiah VC House sakna a hmu a. Hemi hmang hian 2023- 2024 ah 19 sak niin, 2024- 2025 chhung hian 29 sak a ni tawh a, sawrkarna an chan ve hnu ah VC House 48 sak a ni tawh tih a sawi.
RGSA scheme hnuaiah hian ‘component’ hrang hrang awmin, chu’ng zinga pakhat chu VC House sak hi a ni tih a sawi a. Hei bakah hian VC-te tan computer set leina, VC-te tan training-na tur, Panchayat Learning Centre dinna atan, Common Service Centre dinna atan leh state leh district-a RGSA hnuaia thawktute hlawh atan hman a ni tih a sawi.
VC House sak leh computer set pek hi an bialtu District Local Administration Officer-te thlan niin, House pakhat sakna atan hian cheng nuai 20 ruahman sa a ni tih C Lalsawivunga hian a sawi a. Nikumah VC hrang hrang hnenah computer set 88 sem a ni bawk tih a sawi a ni.
RGSA scheme hian Mizoram pum, Autonomous District Council pawh a huam vek tih a sawi bawk.
VC House 300 chuang sak dilna thehlut
