Nakkum February thlaah Mizoram sorkarin VC inthlan buatsaih a tum a, sawi leh sel awm mah se inthlan buatsaih turin sorkar a inbuatsaih mek. Thu dawn danin, VC inthlan buatsaih tur hian sorkarin tih tur tulte a ti mek a, court thu ngaihchan a ngai a nih pawhin, court thutlukna tur hriat lawk a nih loh avangin sorkar lam chuan tih tur tulte a lo ti a ni.
Inthlan atanga thil tulte tih mek a ni a, a lian tham leh a pawimawh hmasa chu electoral roll buatsaih niin, hei hi district hrang hrangah tih mek a ni.
Electoral roll hi State Election Commission kuta awm a ni a, anni hian district tina bawrhsap office-te hnenah mawhphurhna hlanin, bawrhsap office theuhvin mahni district-ah an buaipui. Tun karah hian hearing neih hman a nih beisei a ni. Kum thar Janaury ni 8-ah final electoral roll tar chhuah hman tum a ni.
January thlaah inthlan puan leh polling booth siam tum a ni tih thu dawn a ni.
VC ding laite term titawiin Mizoram sorkarin inthlan buatsaih hma a tum a, hemi atan hian November ni 20 khan Notification a chhuah a ni. Hemi chungchang hian sawi a hlawh nghal a, All Mizoram VC Association-in Mizoram sorkar hi High Court-ah an khing bawk.
VC Association-in writ petition an thehluh, November ni 20, 2024-a Notification chhuak an khinna chu December ni 12-a ngaihtuah tan turin High Court hian a ti a, mahse November ni 21-ah Notification dang a lo awm tih hriat chhuah a nih avangin, Notification thar hian a hmasa a thiah avangin khin tur a awm ta lo a, VC Association te thu thehluh pawh chu hnuh kir a ni ta a ni.
November ni 21-a Notification chhuak hi mipuiin an hre lo a, LAD website-ah pawh December ni 9-ah dah a ni chauh. Hemi chungchang hian titi a siam leh mek.
Chutiang karah chuan Mizoram sorkar chu nakkum February-a inthlan buatsaih turin a inbuatsaih mek. Local Council term pawh tawi chungchangah chuan thu thar a awm lo nia hriat a ni.
VC inthlan buatsaih turin inbuatsaih
