Mizoram sorkarin VC inthlan a sawn hma dawn a, VC leh LC ding laite’n nakkum August thla thleng hun nei mah se nakkum February-ah inthlan a ni dawn. LAD minister chuan VC inthlan hun sawn hma tum a nih chhan hi sum leh pai fimkhur leh daihzai taka hman a \ul vang a ni tiin a sawi.“Mizoram sorkarin Village Council inthlan a sawn hma chhan ber chu kan state sum leh pai te fimkhur tak leh daihzai taka enkawl leh hman a tul vang a ni ber,” LAD minister C Lalsawivunga chuan a ti.
Thuthar lakhawmtu thenkhatin an kawmnaah LAD minister chuan Finance Commission rawtna angin post devolution revenue deficit grant Mizoramin a dawn zat kum tin a tlahniam tih a sawi a, “A thla bi anga chhut chuan nikum financial year (2023-24) chhung khan thla tin Rs. 122.83 crore Mizoram sorkarin a dawng thin a. Kumin kum kal mekah hian thla tin Rs. 89.91 crore kan dawng bawk a. Nakkum financial year (2025-26)-ah chuan nasa taka tlak hniam belh lehin thla khatah Rs. 48.83 crore vel chuah kan dawng tawh dawn a ni. Khawvel kal phungah thil man hi zawi zawiin a sang chho ve hret hret a, chungte ngaihtuah chuan Mizoram sorkarin sum a hmuh tur te thiam leh fimkhur taka a hman a ngai dawn a, chu chu tuna decision lian tak kan siam chhan ber pawh a ni ta reng a ni,” a ti.
Nakkum financial year chhungin inthlan lian pui pui pali buatsaih a ngai dawn tih a sawi a, August/September-ah Village Council leh Local Council election, November bawrah LADC inthlan, 2026 January/February thlaah AMC inthlan buatsaih a ngai dawn tih a sawi a, a hautak ber VC inthlan hi sawn hma a ngai tiin a sawi.
“A hma lama sawi tawh ang khan nakkum financial year chhunga kan Post Devolution Revenue Deficit Grant nasa taka tlahniam tur kara inthlan hautak tak pali , nuai engemaw zat liamna tur han hmachhawn hi sorkar sum bawmah nghawng lian tham tak a neih loh nan, Section 5 of the Lushai Hill Distrct (Village Council ) Act, 1953-in sorkar thuneihna a pek chu a taka hman a thain kan hria a. Chuvangin nakkum lama election neih tur pali zinga a hautak ber VC Election bik hi sawn hma ta mai ila, kan sum leh pai dinhmun engemaw chen kan chhawk zangkhai thei ang tih ngaihtuah chunga he decicion hi siam a ni e,” a ti.
“Kumin te, nikum lam te khan kan sum dinhmunin duhthu sam lo deuh mah se a pangngaia inthlan hi sorkarin a kalpui thei mai ang. Nakkum bik hi chu a ring a rek em mai a, tun atangin fing taka inpuahchah a ngai niin kan hotute’n an hria a. Sorkar sum dinhmun a chhiat hian a tuar bertu chu mipuite bawk an nih thin avangin VC inthlanin mipuiteah nghawng na taka a neih loh nan tihian kan ti ta mai a ni,” a ti bawk.
VC inthlan hun sawn hma chhan sawi fiah
