Village council leh local council inthlanpui neih huna hman tur electoral roll tihchhuah a ni a. Aizawl Municipal huamchhungah vote nei 244726 an awm a, autonomous district council pathum huamchhung tiam loin district 9-a village council/ local council-a vote nei awm zat chu 723640 an ni. State Election Commission Mizoram thuchhuak angin ADC huamchin ni lo MIzoram district dang zawnga village council leh Aizawl leh Lunglei Municipal huamchhunga vote nei zat hi Nilaini khan tihchhuah a ni a. Hei hi VC inthlanpui neih leh local council inthlanpui neih huna hman tur a ni.
Aizawl Municipal huamchhunga local council leh Municipal pawn, Aizawl district huamchhunga village council inthlanpui neih hun atana hman tur electoral roll ennawnna hi Aizawl district election officer, bawrhsap Er Lalhriatpuia’n a tlangzarh. Tun tum electoral roll ennawnah hian qualifying date atan 2025 January 1 hman a ni a; 2025 January 1-a kum 18 tlingte chu hming thunluh an ni. Local council leh village council inthlanpui neih hun tur hi SEC Mizoram-in a hranin hriattirna a la tichhuak leh dawn a ni.
Aizawl district huamchhungah hian local council 87 leh village council 70 a awm a. Tun final electoral roll-ah hian LC bikah voter hmeichhia 131423 leh mipa 113303 awmin, an vaiin 244726 an ni. Chhungkua (household) 70582 awmin, mipa aia hmeichhia tamna chu 18120 a ni. VC-ah voter hmeichhia 31869 leh mipa 30078 awmin, a belhkhawm chu 61947 a ni. Chhungkua (household) 17878 an awm a; mipa aia hmeichhia an tamna chu 1791 a ni.
Aizawl Municipal huamchhunga local council leh Aizawl district huamchhunga village council draft electoral roll hi 2024 November 25 atanga December 9 chhung khan electoral roll atanga paih, thun thar, siamthat ngai leh insawn duh tan dilna LLO/VLO hnena thehluhna hun hawn a ni a. Hemi chhunga dilna lut hi 2024 December 10-19 chhung khan MERO/AMERO/ERO/AERO ten an endik a. An enfiah zawh hnu ah thutlukna siamfelin hming thunluh ngai, paih ngai leh siamthat ngai thliarhran a ni. Hemi hnu hian data entry (computer-a thunluh hna) thawh zui nghal a ni a. Final electoral roll hi tlangzarh a ni ta a ni.
Local council /village council electoral roll hi MLA inthlanpuia hman tur nen a hranga buatsaih a ni a; inthun thar, insawn (transfer) leh siamthat (correct) hi MLA roll atan rin nghal theih a ni lo. Chutihrualin, autonomous district council pathum – Lai, Chakma leh Mara ADC chu a hranin VC inthlanpui an nei thin a, electoral roll pawh a hranpaa ennawn thin a ni.
District 9 VC-a voter awm zat:
District VC zat Mipa Hmeichhia Total
Aizawl 70 30078 31869 61947
Lunglei 88 26596 25135 51731
Serchhip 56 24400 26043 50443
Champhai 62 26885 28558 55443
Mamit 92 32161 31449 63610
Kolasib 60 30417 32928 63345
Saitual 46 19894 20387 40281
Khawzawl 38 13802 13946 27748
Hnahthial 32 11377 11783 23160
TOTAL 544 215610 222098 437708
Municipal LC vote awm zat:
AMC 87 113303 131423 244726
LMC 24 19364 21842 41206
TOTAL 111 132667 153265 285932
VC/LC vote nei 723640 AMC huamchhungah vote nei 244726
