Dr. C. Lalrampana
A KAMKÊUNA
A hming atang reng hian he pawl (organization) hi Khawtlang, ram leh hnam tan a chhenfakawm hle tih a hriat theih. Tunhma atangin Mizoram hmun hrang hrangah VDP din a ni thin. Ram a lo changkang zel a, khawtlang, ram leh hnam venghimtu sipai chihrang hrang leh police chihrang hrangte an lo tam tak avangin VDP hi an thiat then ta nge hmun thenkhatah chauh hmuh tur an la awm niin a lang. Tunhmain hmun thenkhata VDP duty-te zingah tlema che hleihluak deuhte pawh an awm chang a awm thin avangin mipuite ngainat an hlawh ta lo deuhte pawh niin a hriat theih bawk. Mahse, VDP-te hi an tangkai hle a, misualte pawhin an tihkhai deuh ber thin niin a lang. VDP hi India Code Section 63 (1)-in a sawi angin District Superintendent of Police-in khawtina mi rintlak leh mi hmingthate lawrkhawmin member-ah a ruat tur a ni a; an senso leh mamawh pawh a tul dan azira pek thin chu a mawhphiurhna a ni. Tun thlenga Mizoram chhunga VDP la awmte pawh an tangkai hle a; khawtlang leh vantlang sualna lama huangtau tak tak leh ruihlo zuar, leh ngaite chetna hluar tur ven kawngah leh dan lova ramdang mi lo lutrute ven kawngah pawh police-te tha tichaktu ber leh thawhhlawk ber pawl (organization) tha tak leh tangkai tak a ni thin.
STATE DANGTE DINHMUN
Bombay Police Act 1951 section 63-in a sawi angin Superintendent of Police chu mipui humhalhna tur, thil neihte venhimna atan leh khaw hrang hranga himna atan V.D.P. tia koh voluntary body din turin thuneihna pek a ni. Tin, Sec.63 ( b ) (7)-a tarlan angin chutianga member dinte chuan S.P.-in a ruahman angin hna an thawk ang a, Bombay Police Manual Vol.III, Rule 508-a tarlan angin V.D.Ps. patrolling atan pawh hman theih a ni a, natural calamities dona atan leh a pawimawh ber chu intelligence atan pawh hman theih a ni. Meghalaya-ah pawh khuan VDP hian Police-te nen hian vice raid an nei fo thin a, misual man kawngah police-te an pui thin. VDP service hi helho che vel enfiahna atan a tangkai hle tih hmuhchhuah a ni a, hei vang hian kum 2008 khan helho laka beihpui thlakna hlawhtling tak tak a awm phah a ni. Assam-ah pawh VDO hi community police hna thawk tura tlawmngai pawl a ni. Kum 1949 khan Harinarayan Barua (L) khan a din a, Jorhat district-ah chuan khaw hla tak takte chu anti-social activities laka humhim turin a din a, chutih lai chuan Police force-ah manpower an tlakchham êm vang a ni. Hetianga mahni duhthua khaw humhalhna ngaihtuahna hi a chhehvela district hrang hrangah a darh zau zel a, zawi zawiin Village Defence Organization tia hriat pawl a lo piang ta a ni. Voluntary Village Defense concept hi Assam state-ah chuan a danglam bik hle. Harinarayan Baruah (L) hi he pawl Founder anga ngaih leh zah a ni a, tunah hian registered member nuai 5 chuang an nei tawh a, Assam district zawng zawngah an awm tawh bawk. VD pawl hnathawh, a volunteer leh office bearer-te chu Assam Village Defence Organisation Act, 1966 leh Assam Village Defence Rules in 1986-in a thunun a ni. Village Defence Organization thil tum ber chu State chhunga Law and Order, remna leh muanna a awm theihna tura Police-te tanpui a ni. VDP-ah hian khaw pakhatah volunteer 25 aia tlem lo an awm a, chu khaw huam chhunga hmun bik chu him taka venhim hna thawktu an ni. Tunah hian 22,881 zet an ni. Assam-a VDP registration nei lote 3000 chuang an ni a. Heng zingah hian Registered VDP 1120 leh unregistered VDP 518-te chu Hmeichhia VDP an ni. VDP-te hian hna hrang hrang an thawk a. Police-te chu dan bawhchhiatna leh misualte ven leh hriatchhuah kawngah tanpui leh intelligence khawn khawm. Inthlan laia State machinery te tanpui a bik takin polling booth etc. Welfare activities hrang hrang, kawngpui siam that, sikul etc, thing phunte pawh an thawk thin. Communal riots neih laiin remna inkhawm buatsaih, khawtlang thil kaihhnawih chungchanga awareness camp buatsaih. Sorkar heng facility-te hi a pe thin. fei (Spear), VDP badge, Greatcoat/ blanket, Whistle & cord, Raincoat/nihliap, khawnvar/hmehen, Red sash, Nayak badge-te bakah pawisa hman chawp thlatin Rs. 3,000/- chiah.
MIZORAM DINHMUN
Mizoramah pawh Mizoram Policte Act zulzuiin VDP din a ni a, an dinna apiangah khawtlang leh mipui tan an thawk tha hle thin. Lunglei Police-te chuan thla tin an bial chhunga Village Defence Party (VDP) tha ber, thla khat chhunga an report pek dan leh Local Police-te report atangin an thlang thin a. Ni 29.5.2023 khan VDP, Lunglawn hnenah sualna venna leh dona kawnga April, 2023 chhunga an thawh that avanga VDP tha bera thlangin ngaihhlutna thuziak an hlan a, torch light engmawzat an pe bawk. Oct 4, 2024 khan Saitual district chuan an district huam chhunga VDP thawk tha ber saitual VDP hnenah lawmman pakhatna a hlan a, reflective jacket leh hmehente an hlan bawk.
A TLANGKAWMNA
Kan thenawm state Assam bakah Meghalaya leh Maharastra-a VDP-te dinhmun leh an tangkaiziate kan kan tarlang ta a. Mizoramah pawh VDP kan la neih chhunte pawh an thawk thain an tangkai hle. VDP hian mipuite himna kawnga sulsutu, misual, ruk tuk hmang te, midang tihbuai chingte, suah sualna kawng hrang hrang zawha, mipui nunphung tibuai thinte mana, Police te kuta hlan thintu pawl tha tak, Village Defence Party kan nei hi a thlamuanthlak hle. A bikin thitlang mipui nun an ti ralmuang thin hle. Dan leh hrai kenkawhna lama hma latu Police leh Excise-te tan pawh kutke pawimawh tak an ni. VDP tha tak chuan khawtlang an vawng ralmuang a, misual, mi bak a chet lak chingte an tawmim phah a, pawl tha leh tangkai tak a ni thin a ni. Mipui inchiahpiahna, ramri hrula awm, Champhai District, Kolasib, Lunglei (tlabung), Lawngtlaiahte hian mipuite hian kawng hrang hrangin VDP hi an mamawh thar lehzual niin a lang a. Sawrkarin a recognised loh JAC kan tih angte ai hian khua leh veng hrang hrang hian Police-te kaihhruaina hnuaiah VDP hi mipui huapin din tharleh ni ta se, ruihhlo zuar, ngawl vei leh vantlang sualna chihrang hrang tam tak hi kan tireh theiin a rinawm. Ramdang mi lo lutrute ven kawngah leh dan lova sumdawnna smuggling khuahkhirh kawngah te, nawhchizawrh, inbum leh a bik takin kan thalai rual ruihlo laka an fihlim theihna turin khawtin leh vengtinah VDP ten khauh takin venhim hna thawk leh theuh thei se, tun ai hian kan ram sualna hi a ziawm ngei ang.