Lallunghnema
Charity Lodge
Contact – 9862288182
Political Party ho chuan an party chauh an vei a. An Unit an vei a, vote hmuh tam dan ringawt an ngaihtuah a. Ram mipui thatna vei tak tak si lovin an theih tawp chhuahin an Party tan an hun hlû an hmang a. Ram thatna aiin an Party thatna an ngaihtuah a. Inthlannaa an chak dan tur ringawt an ngaihtuah a, thil tihpuitlin theih loh an tiam kûr zut a. An sawrkarna tur a nih phawt chuan eng hmanrua pawh an hmang hreh lova, dawt an hreh lova, dawtin mipui an bum a. Anmahni pumpui puarna tur chauh an ngaihtuah a. A lemin ram an vei a, an sawi an sawi a, an ti chuang hlei lova. Ram hmasawnna tlangaupuiin tha ber ni turin an inzuar a; mahse, an sawrkarna an chan meuh chuan an thutiamte, an thusawi te chu an theih nghilh nghal hmiah a. An kuta ram rorelna a awm hnu chuan engkim ti thei leh thuneitu berah inngaiin a thim a var thlu lo pawh thlu zo tawh lovin, an Party tan, an chhungte tan, an thiante tan, an laina te tan ngaihtuahna an seng a. Ram mipui thatna vei lovin anmahni thatna an vei ta zawk thin a ni.
An mit tihdela awmin an beng a lo ngawng zova, an ngaihtuahna tihchawlawla awmin vei tur dik pawh an vei thei ta thin lo a ni. Minister emaw MLA emaw an han nih meuh chuan an tawng pawng vawk lal len ve ringawt a. A thâwk a phitin an inti lian ve ringawt bawk a. Inthlan laia ‘a kâ pawh zen ila, min seh lovang’ tih theih khawpa dawh theihna ngah, nun nêm, zaidam, ngilnei, insûm thei, thuhnuairawlh thin kha tihâtin an awm nghal a. Thianghlimna tinreng tiam thinte kha thuneihna an chan meuh chuan an lo thianghlimna nun an hlat leh hle si! A hah thlak viau a ni. Corruption hua, ram hlui zia mal mâk ngam inti thin mah nise, corruption hnawl tak aruangin hleih neihnain an khat lawi si a nih hi! Ram hlui ze nawi chu bansan a har ta em em bawk a. Kal hmasate hniak hnung zuiin an thil tha lo tih thinte chu tih a lo ngai ve ta a. Nepotism, India Danpuiin a khapte chu vulh len a lo ngai ta zel bawk a. Equality, Danpuiin min pekte chu vana rah ang chauh a ni ta mek zel bawk. Thu mai a lo chang zo ta thin bawk a ni. Discrimination, inthliarna te pawh, ruling leh ruling lo tih hian a la hrilhfiah chhunzawm zel a ni. Rethei chung leh chân huam politics khelh chu thil ni thei niin an hre lova. Mahni inhai vur tura MLA ni tura koh chhuah ang maiin an mit lenna chu contract hna awmna, material supply tur tamna, sawrkar hna ruak tamna hmun leh department a ni ta zel bawk a. Ram mipui tan engkim hloh huama beih ai chuan engtin nge kan party hian kan party worker-te tan sawrkar thau kan sawh theih ang, tih chu an vei ber a ni ta mek em? tih hi mipui zawhna lian tak a ni.
Sawrkar kan hre fuh lova, Political Party kan hre fuh hek lo. Sawrkar chu mipui siam a ni a, mipui ta a ni. Political Party pawh mipui din a ni a, mipui tana ding tur a ni. Mahse, mi tlêm te tan a la ni fan! Sawrkar hi Party mal tâ a ni lova, mi tlemte tan a ni hek lo. Chief Minister, a khawnbawl Minister leh MLA te tâ bik a ni hek lo. An Party mi leh sate tâ a ni lova, an chhungkhat laina hnaite tâ a ni hek lo. Sawrkar hnathawkte tâ a ni lova, mi zawng zawng tana din a ni e; he sawrkar hi!
Tuna kan mamawh ber chu Lalna leh thuneihna thlahlel lo mi, mipui rawngbawltu dik a ni. Mahni inphat ngam, inseng so ngam, ram mipui tana retheih huam a ni kan mamawh ber chu ni.
Kohhran lam han hawi tel leh zel ila. Ramthar, ramthim vei lovin, thlarau bo te vei hek lovin mahni kohhran ram kan vei ta zawk a nih hi! Pathian ram zauh zel ai chuan Kohhran Pawl ram than lenna kan vei ta zawk a nih hi! Sum tuak kan vei a, building tha kan enghelh a, Biak In tha inel nan kan hmang a. Kan vei ber pawh a ni ta hial mai! Tuna kan kal dan hi chu a Pathian thu ta lo deuh a nih hi! Inngaihtuah harh a hun ta a ni lawm ni? tih hi kan thupui kan zir tur pawimawh tak a ni ta! Kohhran programme-in kan khat a, kan thinlung ngaihtuahna luahtu ber pawh kohhran programme a ni ber tawh. Budget hrawl pui pui kan siam a, target kan intuk a, target khum loh hlau reng rengin kan phili buai kum tluan a. Thlarau bo vei ni lo hian kohhran sum ngah kan vei ta zawk ni te pawhin a lang ta hial mai.
Tlawmngai Pawl te hi han thlir thuak thuak ila, heng pawla inhmang lo chu rual pawl lovah kan inchhuah ta hial mai. Pawl lian pui nghet tak kan vei mek. A thlamuan awm hle. Mahse hengte hian vei tur dik kan vei tak zet em? tih hi zawhna pawimawh tak a ni chho mek. Kan ramah thalai jail tang 6000 chuang englai pawhin an awm, tihte hi a dik ngai a nih chuan thil dik tawk lo chu a awm tih a chiang hle a ni.
Heti hian i ngaihtuah teh ang. Mipat hmeichhiatna hman sual hluar lutuk ta te, thalai zingah ruihhlo ngai tam ta lutuk te, in chhung khur tla bal lutuk te, chhungkua fellowship awm ta mang lo te, nupa inthen tam lutuk te, dan leh thupek zah taka zawmtu awm ta mang lote hian nun an tingui a, vei tur dik tak vei loh vang chu a ni ngei ang. Tun atan chuan tâwk mai teh se, ka inâng thinrim tak ngial dawn e.
Vei tur dik vei ila, tih tur dik ti ila, kan ram hi kan siam tha ang.