Venezuela president atan Maduro

President Nicolas Maduro chuan Venezuela presidential election ah chakna a chang tiin electoral council chuan a sawi.
Head of the National Electoral Council (CNE), Elvis Amoroso, Maduro nena inhnimhnai em em chuan ballots 80% chhiar tawhah President Maduro chuan 51.20% vote hmu in a elpui hnai ber chuan 44.02% a hmu tiin a sawi.
Venezuelan opposition te chuan CNE thupuan chu hnawlin inbumna tia sawiin hmalak zui zel an tum thu an sawi bawk a.
Opposition te chuan an candidate Edmundo Gonzalez chuan 70% vote hmuin president-elect dik tak zawk a ni, an ti bawk.
Opposition-te chuan vote tally an dawn chin leh exit poll leh quick counts te nen vek Gonzalez chuan Maduro aiin 40 percentage point-in a hmu tam zawk an ti bawk a.
Kum 11 lai rorelna lekkawh tawh President Maduro paihthlak nan hian Opposition te chu tangrualin Gonzalez an vawrhchhuak a.
Inthlan hmaa Opinion poll laknaahte Gonzalez chu chungnung fe zawka sawi vek a ni bawk.
Voter tam tak te chuan socialist PSUV tena kum 25 lai President Hugo Chavez kaihhruaina hnuai leh kum 2013 a cancer vanga a tih hnua Nicolas Maduro an a thlak hnuah sorkar thar an duh thu an sawi a ni.
Inthlan hma atang tawhin sorkar chuan vote a tihchingpen hlauhna a lian hle a, opposition te pawhin chu chu an hlauh ber a ni bawk.
US Secretary of State Antony Blinken chu National Electoral Council thupuana ngaihthatlohna nei zingah telin US chuan ‘inthlan result chu Venezuelan mipui te duh dan emaw vote dan a nih loh hlauhna a nei lian hle’ a ti. Inthlan buaipuitu National Electoral Council chu government loyalist rual te kaihhruai a ni.
Chilean president Gabriel Boric pawhin inthlan result chu ‘awih harsa’ tiin a sawi bawk a. Boric chuan langtlang takin engkim enfiah ni se, international observer ten enfiah vek bawk se tiin a sawi.
Uruguay president pawhin Maduro sorkar chu inthlan result chu eng pawh ni se chakna an chang lui dawn hrim hrim tiin a sawisel bawk a.
Cuba sorkar erawhin lawmpuina thu a sawi nghal thung a. Maduro ngei pawhin ‘remna leh ngelnghehna in chakna a chang’ tiin inthlan result chungchang a sawi bawk.
Kum 2018 a inthlanah pawh khan fel lo takin maduro a chak tih a ni tawh a. Kumin inthlan hmain President Maduro ngeiin inthlanah ‘engti kawng pawhin chakna kan chang dawn’ a tih chuan ngaihthatlohna a siam bawk.