Islamist firfiakten an thenawm rama pawikhawihna an thlen chhunzawm zel laiin Ghana chuan European Union (EU) nen ram venhimnaah inremna an ziak.
Inremna hi Accra-ah EU foreign policy chief Kaja Kallas-i leh Ghana Vice President Naana Jane Opoku-Agyemang-a ten Thawhlehni khan an ziak a, firfiakte dona leh cybersecurity lama thawhhona tihchakna tur an thlir deuh bik.
Ghana hi Africa ram zinga EU nena hetiang inremna siam hmasa ber a ni tih Opoku-Agyemang-a chuan a sawi.
Ghana hi tun dinhmunah helho tharum thawhna thlen tam lohna la ni mah se an chhehvel Africa khawthlang lam chu al-Qaeda leh Islamic State (IS) pawl inzawmkhawmte hmalakna hmunpui a ni mek.
Inremna siam hian ‘EU chuan Ghana-in ram pum leh a chhehvela hlauhawm awm mekte hmachhawn tura hma a lakna chu thlawp a tum tih a tilang’ tih Ghana national security coordinator Osman Abdul Razak-a chuan thuthar lakhawmtute a kawmnaah a sawi.
Kallas-i pawhin EU chuan Ghana ang Africa khawthlang ramte chu ‘firfiakte dona, ramri venhimna tihchak leh tuipui lama venhimna tihchak’ turin a thlawp tih a sawi ve bawk.
Accra an tlawh tum hian EU aiawhte hian Ghana sipaite hnenah drone, anti-drone system, bomb sutna lirthei leh motorcycle te an hlan nghal.
Tun hnaiah al-Qaeda leh IS-a inziak lut pawlte chuan Burkina Faso, Niger leh Mali-ah ram an nei tawh a. Ivory Coast, Benin leh Togo-ah te pawh beihpui an thlak tawh bawk.
Tanpuitu pawlte chuan kum sawm kalta chhung khan Ghana hmar lam chiaha awm, Burkina Faso-ah hian helho chetna avangin mi maktaduai hnih vel baihvaia an awm phah tawh thu an sawi.
Sawi dan thenkhatah chuan Burkina Faso sipaiten helho hi an rama an beih nasat avangin Ghana-ah intung ding thar leh turin an kal thin niin sawi a ni a. Ralthuam, ei leh in leh tuialhthei tawlh nan an hmang bawk.
Venhimna thilah Ghana leh EU-in inremna ziak
