Ventilator hmanga thawktir Sweden footballer Olsson
A thluak lam harsatna (acute brain-related illness) avanga a chenna ina nikhaw hre loa a tluk hnuah Sweden midfielder Kristoffer Olsson chu damdawi inah ventilator hmanga enkawl a ni tih a khelhna club Midtjylland chuan Thawhlehni khan an puang.
Arsenal player hlui hi tunah kum 28 mi niin, Sweden tan match 47 a khel tling tawh a; a khelh mekna Danish Superliga club thuchhuah chuan February ni 20 khan an ina a awm laiin Olsson hi nikhaw hre loin a tlu tih an tarlang.
Midtjylland chuan Denmark rama medical expert tha ber berte’n an vil mek tih sawiin, enkawlna dik tak a dawn theihna’n a natna an zirchian mek thu leh damdawi ina dahluh a nih hnuah a chhungte leh Midtjylland staff-te’n an awmpui reng tih an sawi a, specialist-te enkawlna a dawn mek thu an tarlang tel.
Club thuchhuah hian tunhnaia an player hmuh tur awm tak mai loh vanga a dinhmun chungchang tarchhuak tura nawrna a nasat em avanga thuchhuah siam an nih thu leh an midfielder natna chungchangah mahni inhliam emaw pawn lam atanga hliam lam vang a nih loh thu an sawilang tel bawk.
Olsson hian Arsenal-a a playing career a tan hnuah Midtjylland, Swedish side AIK, Russian Premier League club Krasnodar leh Belgium club Anderlecht tan a khel kual a, nikum khan Midtjylland-ah a kirleh ta a ni.
A chawrchhuahna Gunners pawhin X kaltlangin dam leh thuai tura Kristoffer an duhsakna thuziak an tarchhuak ve tawh bawk.
Ventilator hmanga thawktir Sweden footballer Olsson
