Vietnam lawng chesualah mi 37 thi
Khaw chhe tak hnuaiah Vietnam-a khualzin phur lawngleng letah mi 37 vel an thi a, mi eng emaw zat chin hriat lohvin an awm bawk.
Chhiatna hi an ram hmar lama khualzinten an tlawh nasat tak hmun, Ha Long Bay-a thleng a ni.
Lawnga chuang tam zawk hi an khawpui, Hanoi atanga heng lai hmun tlawhtu Vietnamese chhungkua an ni.
Chhanchhuah hna thawktute chuan ruah tam tak sur vangin dam chhuakte zawn hna pawh a thawh hleih theih loh niin an sawi a, heti chung hian mi 11 chu tui atangin damin an la chhuak.
Wonder Seas an tih lawngah hian an chetsual lai hian mi 53 an chuang a, thli na tak leh ruah tam takin a nuai thut niin Vietnamese Border Guards leh lawng sipaiten an sawi.
Thil thleng hmutu pakhat chuan Inrinni chawhnu dar 02:00 (India-a chhun dar 12:30) velah khua nasa takin a dur tan niin AFP news agency a hrilh a. Kezungpui tiat tiat rial tlain tek leh ruah a thawk ta chiam niin a sawi.
Chhanchhuah zingah hian mipa naupang kum 10 mi, lawng inkhup hnuaia tuiin a chim loh, boruak thawk tur awmna laia lo awm pawh a tel.
“Thawk ka la vak a, tuiah ka lut a, ka hleuh bawk a. Puitu tur ka au vak a, lawng khan min chhan ta a ni,” tiin a nu leh pate nena zin naupang hian sorkar chanchinbu, VietnamNet a hrilh.
Ruang lak chhuah tawh zinga pariat vel chu naupang an ni tih VNExpress chuan a tar lang.
Chhanchhuah hna hi Inrinni zan bakah chin hriat loh an la awm avangin Pathianniah pawh thawh chhunzawm a la ni.
Prime Minister Pham Minh Chinh-a chuan a tuartu chhungkuate a tawrhpui thu a sawi.
Thuneitute chuan chetsualna thlen chhan an chhui dawn tih an sawi a, ‘dan bawhchhia’ an awm a nih chuan na taka hrem a ni ang tih sorkar thuchhuah chuan a tar lang.
Quang Ninh province-a Ha Long Bay hi tuipuia thliarkar inkhawh lut tam tak awmna hmun niin khualzin pawhin an tlawh nasa hle a, kum 2019 pawh khan mi maktaduai li chuangin tlawhin Unesco World Heritage site a ni.
Vietnam lawng chesualah mi 37 thi
