Ningani zan khan Europa League last 16 khelh zawh a ni a, English club pahnih; Aston Villa leh Nottingham Forrest ten hnehna changin quarter-final an lut. Villa hian Lille lakah awlsam taka hnehna an chan laiin Nottingham Forrest erawh chuan penalty shoot-out ah hnehna an chang thei hram chauh thung.
Villa an chak nawn leh
English club Aston Villa chuan Mimuala an lo hneh tawh Lille chu Villa Park-ah an mikhual. 1-0 a hmahruai chunga inlan Villa hian an mualah hnehna an chang nawn leh a, si belhkhawmah 3-0 a hnehna changin quarter-final an inhlangkai.
Villa Park-a inkhel Aston Villa leh Lille te hi an inhnehtawk viau a, goal pawh a lut lawk thei lo. Goal thun tuma an innawr tawn viau chungin chawlhlawk hmain goal a lut thei lova, goal awm lovin chawlhlawk an hmang.
Chawlhlawk hnu lamah inkhel a hmuhnawm chhunzawm a, tha lehzual zawka inlanin goal hnih an thun zui ta reng bawk. Villa tan hian John McGinn chuan minute 54-naah hmahruaina goal a thun. Lille mualah an lo chak tawh bakah an mualah goal an thun hmasak leh vangin Aston Villa dinhmun a tha viau tawh. Dinhmun tha takah an din vangin an phur a, inrintawkna sang tak nen an mualah an inlan chhunzawm. Inkhel a hmuhnawm chhunzawm viau a, hun tawp dawn hnaiah Villa an che fuh nawn leh a, Leon Bailey chuan minute 86-naah an goal hnihna thunin an hmahruaina a tizau. Bailey goal thun hnuin goal dang a luh belh thei tawh lova, Aston Villa chuan an mualah 2-0 in hnehna an chang.
Lille mualah 1-0 a chak tawh Villa hian si belhkhawmah 3-0 in hnehna an chang a, awlsam pangngai takin quarter-final an lut. Villa hian semi-final luh inchuh turin Italian club Bologna an hmachhawn zui leh ang. Villa hmachhawn tur Bologna hian last 16 a an khingpui AS Roma chu si belhkhawmah 5-4 in an hneh hram a, harsa takin quarter-final an lut. Bologna leh Roma te hi last 16 first leg-ah 1-1 in an inhnehtawk a, an mualah chak zo lo mah se Bologna hian mikhual an nihna hmunah 4-3 in hnehna an chang hram a, Roma an hnawtchhuak zui ta a ni.
Forrest an vannei
Aston Villa an tlang rual hian English club Nottingham Forrest chuan penalty shoot-out ah FC Midtjylland an hneh hram a, harsata takin quarter-final an inhlangkai.
Nottingham Forrest hi an mualah 1-0 in an lo tlawm tawh a, an dinhmun a chhe hle. Dinhmun chhe tak chungin Denmark lamah an zin a, MCH Arena an leng lut. Dinhmun chhe zawk ni bawk mah se Mimualah hnehna an chang hlauh thung. Robinhood-a te khua Nottingham Forrest tan hian Nicolás Domínguez chuan minute 40-naah hmarhuaina goal a thun a, he goal hmang hian 1-0 a hmahruai chungin chawlhlawk an hmang.
Chawlhlawk hnu lamah Forrest an khel tha chhunzawm a, goal an thun belh leh thuai. Chak ngei tuma tan khawh Forrest tan hian Ryan Yates chuan minute 52-naah an goal hnihna thunin an hmahruaina a ti zau a. Ryan Yates goal thun hmang hian si belhkhawmh 2-1 in hma an hruai let ta chiah. Tla mai thei dinhmuna an din hnuin mualneitu FC Midtjylland in goal thun tumin tan an khawh nawn leh. Mualneitu team tan hian Martin Erlic chuan minute 69-naah goal thunin an si phurh a sut a, 2-2 in an inhnehtawk leh ta chiah.
Chak ngei tumin tan khawh dun mah se hun pangngai leh extra-time-ah chak zawk an awm thei lo. Minute 30 dang pek belhah pawh chak zawk an awm theih loh zel vangin tie-break hmangin quarter-final lut tur zawk tih chian a ni. Tie-break-ah hian Nottingham Forrest in 3-0 ngawtin hnehna an chang ta mai a. Ropui takin quarter-final an lut ta a ni.
Villa leh Forrest an tlang
