Inrinni zana Premier League khelhah palina luah tuma inel mek Aston Villa leh Tottenham Hotspurs ten hnehna an chang. Villa hian 2-0 in an mikhual Wolves an hneh a. Tottenham pawhin an mikual Luton Town chu 2-1 in an hneh ve bawk.
Palinaah awm mek, Tottenham lakah palina an nihna hloh thei dinhmuna ding mek Aston Villa hian Villa Park-ah Wolves an mikhual. Chak an mamawh ang ngeiin an mualah hnehna chang a. Chawlhlawk hma leh hnuah goal khat ve ve an thun.
Chak mamawh Villa tan hian Moussa Diaby chua minute 36-naah hmahruaina goal a thun a. Goal khata hma an hruai reng hnuin Ezri Konsa chuan minute 66-naah an goal hnihna thunin an hmahruaina a tizau. Diaby leh Konsa goal thun hi an chakpui a, an mualah ngei point thum hlu tak an hmu.
Wolves laka chak Aston Villa hian khelh 30 atanga point 59 hmuin palina an luah chhunzawm a, an hnuai chiaha awm Tottenham nen an inkarah point hnih a tla zep mek. Villa hian Spurs aiin an khel tam zawk thung a, an dinhmun a him lo hle.
Top 4 huang luah ngei tuma tan khawh Tottenham chuan an mikhual Luton Town lakah si an phur hmasa zet a. Own-goal hmanga an si phurh an sut hnuin hun tawp dawn hnaiah captain Son Hueng-min goal thun hmangin hnehna hlu tak an chang.
Tottenham muala lenglut Luton hian team lian lakah bul an tan tha viau a, inkhel tan atanga minute thumna lekah Tahith Chong chuan hmahruaina goal a thun. Minute thumna leka goal an chhuah hi Spurs in hun rei tak an sut thei lo. An mualah si an phurh reng hnuin Tottenham an vannei hlauh a, minute 51-naah Issa Kaboré chuan an lamah a ti-goal hlauh mai a, Tottenham in an si phurh an sut theih phah.
Vanneihthlak taka an si phurh an sut hnu pawhin Tottenham hian goal an thun belh thei lawk lo. Chak ngei tuma tan an khawh zui an hlawkpui a, hun tawp dawn hnaih minute 86-naah Son Heung-Min chuan chakna goal hnu taka a thun a, an mualah 2-1 in an chak zui ta a ni.
Luton Town laka chak Tottenham hi pangannaah an awm chhunzawm a. An chunga awm Aston Villa aiin point hnihin hniam zawk mek mah se vawi khata an khelh tlem zawk vangin palina ni turin an dinhmun a tha viau rih. Aston Villa, Tottenham leh Manchester United ten palina nih an inchuh na viau dawn a. Champion tuma Liverpool, Arsenal leh Manchester City te inel boruak ang tluk zetin palina nih tuma inelna boruak a hot in, a ngaihdawn chho dawn niin a lang.
Villa leh Spurs an chak
