Vinicius diriamtu Valencia fan-te’n thiamloh an chang
Real Madrid Brazilian mihang player Vinicius Jr. hi a thiam si a, a hmel tehsawng hi hi lehlam pawl tawh phawt tana diriam leh auhnawmnah chakawm tak a lo ni bawk nen Spanish League season hnih liamta chhung khan tum 16 ngawt a vunrawng behchhana diriam a tawk tih Spanish prosecutor-te a hrilh a, chu’ngah chuan thubuai hla buaia kal tawk a awm a, tun Thawhtanni khan Valencia football fan pathumte chu chi inthliarna lam hawia Brazilian an chhaih avangin court-in thiamloh a chantir a, thla riat lung in tang turin hremna pek an ni ta!
La Liga president Javier Tebas chuan hate crime avanga court thutlukna chu Spain rama chi inthliarna (racism) an do mekna kawngah chanchin lawmawm leh ropui a nih thu sawiin, Vinicius Jr tawrhna zozai pawh a chhawk huai dawn niin a sawi a; inkhel en tura football stadium lut leh tur zawng zawngte tan thuchah chiang zet a nih thu leh ‘racism’ lanchhuahtir tawh phawt chu La Liga lamin chhuichhuaka court lama an thlen zel tur thu leh chutiang mite chuan criminal thubuai an awrh zel tawh tur thuin vaukhanna a chhakchhuak.
Valencia team supporter pathumte hi kum hnih chhung atan football stadium tawh phawt lut thei lo tura phuar an ni nghal bawk.
Thubuai an awrhna hi nikum May thla Valencia khelmual Mestalla stadium-a thil thleng vang niin, league match khelh laia a vunrawng vanga Brazilian forward an chhaihnawmnah rah an seng ta a ni!
La Liga thuchhuah chuan racism dona chungchanga tualchhung leh international huapa an campaign chuan rah a chhuah niin an sawi a, player-te telna FIFA anti-racism committee an din pawhin kawngro a su hle tih leh Vinicius thubuai ngaihtuah a nih laiin thiltisuala puhte chuan Vinicius Jr., La Liga leh Real Madrid laka ngaihdam dilna an chhiarchhuak tih an tarlang tel bawk.
Kumin March thla khan Vinicius hi press conference laiin a tap chhuak hial a, a vun rawng avanga chhaihnawmnah leh diriam a tawh nasat avangin phur leh nuamti taka football khelh pawh harsa a tih thu sawi chungin a harsatna sutkianpui turin Spanish thuneitute a ngen a, kha khan rah a chhuah a tih theih bawk awm e.
Vinicius diriamtu Valencia fan-te’n thiamloh an chang
